DIMP a contesta De Meza dialuna pero abogado no ta duna comentario mas

ORANJESTAD – Departamento di impuesto (DIMP) a cumpli cu e demanda di parlamentario Mike de Meza pa manda un carta positive p’e. Kico e contenido ta, no ta conoci pa noticiacla ya cu e abogado a opta awor pa no duna mas comentario. “Sorry, awe si ta no comments” e abogado Desiree Croes a reacciona pa Noticiacla dialuna atardi despues di cu e deadline a vence.  Inicialmente a informa cu lo a bay entama un caso sumario awe diamars of mas tarda diaranson. Sinembargo, algun rato despues, cos a cambia, ora cu a bira conoci cu ‘toch’ un reaccion a drenta di parti di DIMP.  Pero ora cu a puntra kico ta bay sosode awor, cu e contesta a drenta, e abogado a opta pa no duna mas comentario. Pues no ta sigur kico e contesta tabata. 

E PROME DEADLINE

Mester bisa cu esaki ta e di dos deadline cu DIMP a haye confronta cune, ya cu e prome deadline poni pa de Meza su abogado, tabata pa 17 di April ultimo. Aki DIMP a contesta de Meza, y noticiacla a compronde cu e contesta ey tabata uno negativo pa de Meza. E deadline, tabata pasobra e prome biaha cu a pidi DIMP pa info, e info a bin, pero cu segun e abogado, e informacion no tabata Cuadra. “E no ta klop”, e abogado a bisa e portal aki e tempo ey. Basa riba esey, a exigi un carta mas specifico y a pone un ultimatum. DIMP a cumpli cu e demanda ey pero no a cambia di pensamento y a manda un reaccion negativo.

KICO E SILENCIO AWOR TA BISA

E hecho cu e abogado awor a opta pa no papia mas, por nifica varios cos. Entre nan, cu un biaha mas e contesta ta negativo, y ta evaluando con awor pa ‘forza’ un contesta di DIMP cu ta positivo, y con pa haci esaki via Corte. Echo ta cu dialuna e abogado tabata cla pa bay corte, pasobra DIMP inicialmente no a cumpli cu e orario di 3pm. Pero ora cu DIMP a contesta, despues, cos a cambia. Por ta tambe cu e carta ultimo por ta un apertura cu de Meza, pa cual a opta pa no papia mas, of cu a condiciona e apertura, cu un silencio pa prensa. Echo ta, cu diripiente cos a keda keto. Tur lo menciona den e paragrafo aki, ta suposicion, basa riba e silencio repentino di e abogado riba e caso. Tempo lo mustra kico e siguiente paso ta.