Croes: DIMP a cumpli cu deadline di Mike de Meza

ORANJESTAD – Mientras cu e no por a divulga e contenido di e contesta di awe ricibi di departamento di impuesto (DIMP), abogado di parlamentario Mike de Meza, esta mr Desiree Croes a confirma diahuebs atardi na Noticiacla cu e contesta pendiente di DIMP a drenta, cumpliendo cu e deadline poni di 3'or di awe diahuebs atardi,  y cu awor e abogado tin cu  delibera cu su cliente riba e siguiente pasonan. Si esaki kier men cu e parlamentario a haya bon noticia of mal noticia di DIMP, e abogado no por a bisa. Pues de facto, a keda mes leu, pasobra no sa ainda si esaki ta 'clear' e parlamentario pa awor e por bira minister of no. Cu esaki pues, por lo menos DIMP a cumpli cu e exigencia di e parlamentario, pa suministra extra informacion manera cu a pidi e siman aki. Ta drenta un fin di siman atrobe, un otro siman, sin cu tin claridad riba e situacion aki, unda cu 'falta' un minister cu ainda no sa su destino politico of con esaki tin cu bira. Si e ta keda parlamentario of si e por bira minister pa caba. Na Corsou, tabatin un caso casi similar, unda cu e candidato pa minister, a hiba gobierno corte, y a perde esaki. 

E SITUACION

Manera cu Noticiacla a raporta diahuebs mainta, no obstante e echo cu DIMP a entrega documentonan fiscal di  sr de Meza dialuna, riba peticion di e abogado, ainda e ‘deadline’ pa DIMP entrega documento pertinente mas tarda awe diahuebs pa 3pm a keda vigente. Tabata diaranson atardi cu Noticiacla a puntra e abogado, si e deadline ta sigui vigente, y e abogado den su contesta cortico, pero firme a bisa ‘Si!”. Ora cu a puntra e abogado pakico ta mantene e deadline si DIMP a manda documentacion caba, e abogado tabata mas specifico. “Si, pero ainda e no ta klop!’. Esaki a nifica cu e informacion cu a wordo manda, ainda no a clarifica e situacion fiscal di su cliente, pa cual e deadline di awe a sigui vigente. 

DEMANDA INICIAL

Prome cu esey, dialuna cu e abogado a informa publicamente cu debi cu no ta hayando informacion pertinente pa su cliente, unda cu e por deduci y comproba cu tur cos ta cla cu ne fiscalmente, y cu e ta ‘in the clear’ of por lo menos tin un claridad total di DIMP, ta exigi e claridad ey por escrito, mas tarda awe diahuebs pa 3’or di atardi, sino ta tuma paso legal. Riba e mesun dia, DIMP lo a manda documentacion. E documentacion ey a bay pa ex formador, awor prome minister Mike Eman, cu na su turno a hiba esaki pa Gobernador di Aruba SE Alfonso Boekhoudt. E siguiente paso tabata pa Eman papia cu de Meza riba e asunto. Ora cu Noticiacla a puntras sr Eman ki dia e encuentro aki lo a bay tuma lugar, e mandatario no por a contesta esey concretamente. Diaranson e ora Noticiacla a tuma contacto cu e abogado, y e la haya duna e informacion menciona ariba. Pues, ta keda pendiente pa e informacion cu falta, y pa wak si e informacion e biaha aki si ta satisfactorio pa cliente di e abogado.