IMF: Expectativanan di crecemento economico revisa fuertemente

NEW YORK -  E guera comercial di Donald Trump ta poniendo un presion pisa riba crecemento economico mundial. Esaki ta wordo pronostica door di Fondo Monetario Internacional (IMF), cu tambe a bira mas pesimista riba e perspectivanan di crecemento pa Hulanda. E organisacion di stabilidad financiero di Nashonnan Uni ta papia di un “era nobo” pa e sistema economico mundial. Toch mundo no ta bay den direccion di un resecion segun IMF. Tambe ta anticipa cu e aumento di inflacion lo keda limita.

Pa mundo den su totalidad, e fondo ta pronostica un crecemento di 2.8 porciento e aña aki y un crecemento di 3 porciento otro aña. Den e ultimo calculacion na januari, expertonan ainda a asumí 3.3 porciento pa tur dos aña. IMF ta premira cu economia Hulandes lo crece cu 1.4 porciento e aña aki y otro aña, compara cu un crecemento cu tabata premira anteriormente di 1.6 y 1.8 porciento. Esakinan ta ahustenan significante, aunke IMF no ta asina sombrio manera, por ehempel, na cuminsamento di e crisis di corona.

E fondo ta pronostica un bahada significante den cresemento, specialmente na Merca mes. E aña aki probablemente lo tin solamente 1.8 porciento di cresemento, casi un punto di porcentahe menos cu den e calculacion anterior. China tambe ta wordo azota duro. IMF ta anticipa cu e economia di China lo crese 4 porciento e aña aki, un bahada di 0.6 punto di porsentahe. Ademas, tin ahustenan significante pa Mexico i Medio Oriente, entre otro.

Na Europa, y pues tambe na Hulanda, a baha e cifranan menos fuerte. Esaki ta pasobra e impuestonan pa UE no ta relativamente haltu ainda. Tambe IMF ta anticipa un aumento signifikante den gastonan di gobierno, por ehempel riba defensa. Esei mester sostene economia.

IMPUESTONAN

E pronosticonan aki tabata wordo spera anciosamente internacionalmente. IMF ta basa su calculacionnan riba tur e impuestonan anuncia te cu y incluso 4 di april. Esaki ta nifica cu e extencion di 90 dia di tarifanan mas halto anuncia pa Merca pa hopi pais no ta inclui mas. Meskos ta conta pa e ultimo aumento di tarifa entre Merca y China.

IMF ainda no por a calcula tur e posibel consecuencianan di tur loke a wordo anuncia entre 5 y 14 di april Pero IMF si a haci un calculacion rapido. Exclui e agitacion di mercado y otro efectonan, e economia mundial lo crece 2.8 porciento e aña aki y 2.9 porciento otro aña. Segun IMF, esaki ta bastante comparabel cu e cifranan for di e scenario completamente calcula, aunke e cifranan di cresemento por diferencia entre paisnan. NOTA: Articulo cortesia di AD.