Segun minister, mester coregi desicionan di pasado den deporte cu tabatin dudanan huridico

ORANJESTAD – Debi na problemanan interno di fundacionan deportivo, minister encarga cu deporte Gerlien Croes a pidi tur documento di tur fundacion deportivo. Segun e mandatario, como mnister entrante, e la hereda un situacion unda cu tin acuerdonan haci y discusion cu ta wordo hiba ariba maneho di nos facilidadnan deportivo. “ Varios ta e decisionnan cu ta wordo tuma unda cu ta cuestiona e base huridico pa esakinan y cumplimento debido basa riba e acuerdonan haci, for di cual como Minister mi tambe ta responsabel” e la cuminsa na bisa.

COMPROMISO ANTERIOR 

Segun e mandatario, e minister di deporte saliente lo a haci algun compromiso y awe eta sinta cu un situacion caminda cu tin varios partido ta sinti nan mes den incertidumbre.

TUR DOCUMENTACION 

E mandatario a bisa diabierna Santo cu diahuebs e la haci peticion na Fundacion Lotto pa Deporte y Fundacion Facilidadnan Deportivo pa comparti tur documentacion cu tabata tin di tur acuerdonan haci durante e ultimo 20 añanan y tambe notulanan di decisionnan tuma recientemente di directivanan concerni. Algun documento a wordo ricibi caba y e lo yama un reunion cu e partidonan concerni. ” Transparencia y ‘Good governance’ tin cu lidera cada decision cu nos ta tuma y mundo di deporte mester conoce algun cambio real, no solamente cosmetico” e mandatario a finalisa bisando.