Parlamento a yama minister pa duna cuenta tocante e MOU cu Royal Schiphol Group

ORANJESTAD - Parlamento a yama minister pa duna cuenta tocante e MOU cu Royal Schiphol Group. Segun sra Arends-Reyes kende ta alaves presidente actual di comision di Turismo, a hasi un peticion na presidente di Parlamento pa manda pidi Minister Cicilia pa bin Parlamento pa un vragenuur. Ja pa basta tempo tin incertidumbre tocante e tema cu Royal Schiphol Group ta bandona Aruba despues di 20 aña riba nos isla. Sra Arends-Reyes ta di opinion cu manera cu a sosode cu e gabinete anterior, unda cu no ta di acuerdo cu condicionan of cu yega na un impasse, awor mester purba sali afor na beneficio di nos pais y purba pa e ta un 'win-win situation.' No por ta asina cu ta habri porta y laga un partner strategico coi su maleta y bai siendo cu pa e siguiente 10 añanan sigur tin inversionan y cambionan grandi mester tuma lugar na nos aeropuerto sin lubida cu mester keda sobresali den Caribe pa competencia no pasa nos voorbij. Liderazgo ta ora ta tuma decision y keda sin tuma decision hopi biaha no ta conduci na stabilidad. Den bida si bo kier yega leu mester traha hunto a base di cooperacion, vision y confiansa. Aruba ta un isla cu a sa di demostra cu por ta e lider den Caribe den inovacion y desaroyo sostenibel e liderasgo aki pa Aruba nos no por perde. Ja den e prome dia di gobernacion di gabinete AVP-Futuro por a tuma nota di diferente decisionan specifico entre otro cu a ser tuma na bienestar di nos pueblo, por ehempel cu tur pensionado apart, lo ricibi un aumento di 250,- riba nan reparatie toeslag na Mei y asina tur sector lo haña nan atencion entre otro infrastructura, Enseñansa, Turismo, Labor, social, Salubridad y nos grandinan lo haña atencion. Parlamento lo keda vigila e plan di gobernacion di serca y lo keda hasi uzo di e hermentnan cu Parlamento tin.