Temblor di magnitud 4.1 sinti na 40 km zuid di Corsou

WILLEMSTAD. - Den e último lunanan e aktividatnan sísmiko ta basta aktivo den e área di Karibe i Sentro Amérika. Despues ku na òktober di aña pasá Kòrsou a sinti un temblor leve i despues den luna di febrüari último un dado momentu Kòrsou tabata un ratu riba e lista di peliger pa sunami, ayera atardi atrobe a tuma lugá un temblor ku a keda sintí aki na Kòrsou.

Tabata ayera  tardi alrededor di 15:30 ku hopi hende aki na Kòrsou a sinti efektonan di un temblor. Ta trata di un di un magnitut di 4.1 riba Skala di Richter. E temblor a tuma lugá na un distansia di mas o ménos 40 kilometer sùit di Kòrsou i no tabatin menasa di sunami. Den nan nota, Servisio Meteorológiko Kòrsou a splika ku nan lo sigui vigilá e situashon.

Dia 31 di òktober 2024 Kòrsou a sinti temblor leve, e dia ei tabata den kareda di 08:18 or di anochi ku Servisio Meteorológiko a emití un mensahe di informashon (kódigo hel) pa un temblor pa Kòrsou. E temblor di e dia ei a tuma lugá na 54 km wèst di Kòrsou i tabata di un magnitut: 3.5. Skala di Richter.

Den luna di mei di aña pasá tambe Kòrsou a sinti efektonan di un temblor.

Na Tur e okashonnan aki, no tabatin peliger di Sunami pa Kòrsou.

Pa loke ta trata e aktividatnan di ayera ta asina ku tabatin temblor, aunke leu for di Kòrsou, na Puerto Rico di 2.3 i 3.0, na Costa Rica 3.1 i Chile 3.6 NOTA: Texto ta scirbi den papiamento fonetico di Corsou.