Ex politico di Corsou Gilbert Ricardo tambe entre victimanan na Republica Dominicana

WILLEMSTAD - Te ku ayera nochi e eks lider polítiko di partido Mihó Kòrsou, sr. Gilbert Ricardo tabata hospitalisá despues dje tragedia ku a tuma lugá den e diskotèk Jet Set na Repúblika Dominikana.

Djamars mardugá e dak dje diskotèk a kai aden nèt na momentu ku e kantante dominikano, Rubby Pérez tabata kanta. E kantante a keda pegá bou di pidanan di e dak ku a kibra, i a fayesé.

Tabata un fiesta pa un grupo selektá, entre nan algun mandatario dje pais i peloteronan profeshonal. Entre e personanan aki tambe tabatin e yu’i Kòrsou sr. Ricardo. Ayera a bira konosí ku sr. Ricardo tambe ta entre e víktimanan ku a sufri leshon na altura di su kabes i pia, i otro partinan di su kurpa. E no ta den situashon di gravedat. P’esei el a keda hiba hospital Marcelino Vélez Santana pa su rekuperashon. No ta konosí si sr. Ricardo tabata ku mas yu’i Kòrsou den e diskoteka.  NOTA: Texto ta scirbi den papiamento fonetico di Corsou.