Hues ta kita e restriccionnan di Cas Blanco riba e agencia di noticia AP

WASHINTON - E agencia di noticia Associated Press, un di esunnan mas grandi na mundo, mester bolbe haya acceso na lugarnan unda presidente Trump ta papia cu periodistanan, segun un huez Mericano. AP no tabata bon bini den e oficina di Trump ora cu e ta tene conferencianan di prensa desde februari. Periodistanan di AP tambe a wordo prohibi di bula riba e avion di gobierno Air Force One.

E decision a wordo impulsa pa e nengamento di AP pa adopta e designacion di Trump pa Golfo di Mexico. Trump a renobá e laman ey Golfo di Merca pa medio di decreto.

Un hues federal ta basa su desicion riba e Constitucion di Merca. Si gobierno permiti periodistanan un caminda, gobierno no por simplemente prohibi algun di nan pasobra e no ta contento cu nan posicion, huez a bisa.

AP a argumenta cu e accionnan di Trump ta viola e derechonan fundamental di un prensa liber y libertad di exprecion. Cas Blanco no a responde ainda na e sentencia. Un apelacion ta posibel te cu 13 di april.

AP ta un di e agencianan di noticia mas grandi na mundo. E ta proveé ​​comunicadonan di prensa, potretnan di prensa y videonan na numeroso organisashonnan di noticia rond mundo. Pa motibo di e alcanse ey, AP pa hopi tempo tabata un di e club chikito di periodistanan cu ta sigui e mandatario na tur momento y tur caminda.