LaSorte(AHATA): Ta calcula cu 70% di Vacation Rentals no ta pagando impuesto na Gobierno

ORANJESTAD – Pa straño cu por zona, e grupo cu mas a crece den negoshi cu ta atende cu turista pa loke ta hospedahe, esta e asina yama Vacation Rentals, (casnan disponible pa huur pa turista), Aruba Hotel & Tourism Association (AHATA) su CEO ta calcula cu tin como 70% cu no ta pagando impuesto na Gobierno. Asina e CEO, sra Tisa LaSorte a bisa den e programa Noticiacla LIVE diahuebs anochi. Nan ta e grupo cu a crece mas cu tur, den e sector turistico segun e CEO. 

PLACA PERDI NA IMPUESTO

Ademas, segun LaSorte, tin un suma di 70 miyon florin cu ta bay perdi na impuesto door cu e grupo aki no ta pagando. “No tin regulacion pa Vacation Rentals”, LaSorte a bisa. Ta un tema cu AHATA kier atende cu e minister nobo di turismo, mr Wendrick Cicilia proximamente. Esaki aunke cu a reuni cu e minister nobo recientemente, pero no oficialmente.