Gabinete AVP-FUTURO ta cla y casi tur ministernan ta conoci!

ORANJESTAD – Despues di basta wardamento, diamars atardi, algo despues di 3’or, formadornan Mike Eman y Gerlien Croes a anuncia cu Aruba tin un gobierno nobo, gabinete AVP-FUTURO, unda cu inicialmente 6 minister lo huramenta, pendiente di uno cu ta den proceso di screening ainda, y tin un minister plenipotenciario. Tambe loke a keda divulga, ‘porfin’, ta e nombernan di minister (6), cu nan respectivo cartera. Y pa esun cu falta, manera cu Noticiacla a anticipa dialuna, lo duna un otro minister e carteranan ‘tanten’.

KEN TUR TA MINISTER Y DI KICO

-      Mike Eman, Minister President, Algemene Zaken, Cultuur y Natuur

-      Gerlien Croes, Minister Koninkrijk Relaties, Onderwijs, Jeugd, Innovatie, Sport

-      Geoffrey Wever, Minister Financien, Economische Zaken, Primaire Sector

-      Wendrick Cicilia  Minister Turismo, Transporte, Labor

-      Mervin Wyatt-Ras, Volksgezondheid, Sociale Zaken, Ouderenzorg, Verslavingszorg

-      Arthur Dowers , Minister Husticia, Intergratie, Openbare Vervoer , Infrastructuur, Energie, Telecomunicatie

-      Rene Herde, Gevolmachtigd Minister pa Hulanda 

FALTA UN MINISTER

Mientras cu e formador Eman a haci tur intento pa no menciona e candidato cu no a pasa screening, e ta un secreto publico cu e ta ir. Mike de Meza, cu no a logra pasa su screening (ainda). Interesante ta cu a opta pa no postula un otro persona na su lugar, sino cu a opta mas bien pa wanta e posicion ‘habri’ p’e ainda, y mientrastanto duna mr. Arthur Dowers, e carteranan respectivo, cu ta Infrastructura, Energia y Telecomunicacion. No por a bisa cuanto tempo lo warda e proceso pa keda cla y si e lo keda cla, pero tabata hopi cla cu Eman ta determina pa wanta e posicion pa sr De Meza, por lo pronto, dunando e espacio pa keda cla cu e screening di dje. 

HURAMENTACION 

E intencion segun formador Gerlien Croes, ta pa diabierna awor Gobernador Boekhoudt huramenta e 6 ministernan, y pa mesora e gabinete por cuminsa asumi su responsabilidad. E orario ainda no tabata conoci, pero esey ta keda pendiente.