Gerlien Croes (FUTURO) ta ‘kibra silencio’ riba atakenan contra dje

ORANJESTAD – Dialuna e lider di partido FUTURO, a ‘kibra silencio’ riba e ‘insulto, calumnia y insinuacion’ contra su partido. Esaki despues di algun dia di critica severo den su direccion, primordialmente di e partido MEP su integrantenan (pa tardansa den e formacion y cierto medionan di prensa. E no a reacciona si riba e critica di miembro di partido berde AVP, specificamente Desiree Croes, cu a dedica varios post contra e lider politico, relaciona cu e problema cu posicion di gevmin cu AVP a pone pa Desiree Croes. 

SU POST

Den un post riba su pagina di Facebook dialuna, sra Gerlien Croes a reacciona brevemento riba e asunto, indicando cu e la scohe pa keda keto riba e gritonan y cu na su debido tempo e lo papia. Ademas, e la usa e post pa indica cu e proceso di formacion ta yegando su final, bisando ‘Cu mi speransa cu e siman aki nos lo por finalisa tur cos’. Noticiacla a informa tambe dialuna cu e siman aki enberdad por spera un finalisacion di e proceso di formacion.

E INSULTONAN

“Despues di siman nan largo di wanta insulto, calumnia y insinuacion cu Futuro ta tranca proceso, mi curason ta trankil paso nos sa cu cada stap cu nos a tuma nos ta cumpliendo no cu nos votadornan solamente, pero cu ARUBA”, Gerlien Croes a bisa, tocando e parti di insultonan contra dje y su partido. 

REPASA E PROCESO

E post ta cuminsa cu repaso di tur e proceso cu a cuminsa for di momento cu e eleccion a tuma lugar dia 6 di December 2024, te na e momento actual. “ Nos a bisa nos kier wak decisionnan diferente, transparencia, union y otro maneho pa pais Aruba y bo no por ripiti e mesun cos di ultimo 30 añanan y spera un resultado diferente.  Hunto cu mi coleganan di partido nos ta cla pa traha pa e Futuro di nos TUR. Danki na tur cu ta keda kere den e inicio di un etapa nobo pa Aruba” e ta finalisa su post.