ATA: Aruba a ricibi menos turista ‘stayover’ na Februari 2025 compara cu 2024

ORANJESTAD – Dialuna Aruba Tourism Authority a raporta cu den februari 2025, Aruba a ricibi un total di 115,560 huesped “stayover”, esaki ta un disminucion di 5.4%, si compara cu februari 2024, unda a ricibi 122,149 huesped “stayover”.

MERCADONAN Y CATEGORIANAN DI ACOMODACION

Den februari 2025, 81.4% di e total di e huespednan “stayover” pa Aruba a bishita for di Norte America, 4.5% a bishita for di Europa, 12.3% a bishita for di Latino America y 1.8% tawata procedente di otro partinan di mundo. Mirando e categorianan di acomodacion, den februari 2025 27.3% di huesped a keda den hotelnan European Plan, 13.7% a keda den hotelnan All-Inclusive, 21.8% a keda den Timeshare, y 37.1% a keda den otro tipo di acomodacion, incluyendo short-term vacation rentals (STVR).

SHORT-TERM VACATION RENTALS (STVR)

A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2024, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo. Si compara februari 2025 cu februari 2024 por wak cu e ocupacion averahe di e acomodacionan aki a subi cu 2 punto di porcentahe, for di un averahe di 74% na februari 2024 pa un averahe di 76% na februari 2025.  Den caso di entrada, si compara februari 2024 cu februari 2025 por wak cu e categoria ta conta cu un crecemento di 29% den entrada. 

2025 (Year to Date)

Te cu februari 2025, Aruba a ricibi un total di 240,347 huesped “stayover”, esaki ta un crecemento di 16.4% compara te cu februari 2024, unda a ricibi 241,343 huesped “stayover”. Ora ta yega na lider den mercado, te cu februari 2025, 79.6% di e huespednan ta di Norte America, 4.5% ta di Europa, 13.9% ta di Latino America, y 2% tawata procedente di otro partinan di mundo.

Bishita www.ata.aw tur luna pa A.T.A. ‘Statistical Monthly Report’.