Na Corsou a bolbe detene pastoor pasobra a viola condicion di libertad

WILLEMSTAD  – Manera ya a bira konosí, djabièrnè último den oranan di anochi pastor Carlos a bolbe keda detené, despues ku djárason den oranan di mainta el a keda poné den libertat bou di vários kondishon ku e mester a tene su mes na dje. Entre nan ku e no tabatin mag di drenta den kontakto ku niun testigu den e kaso aki, òf persona ku ainda tin ku hasi nan deklarashonnan. Segun informashon ku Extra ta dispone di dje, Pastor Carlos no por a kontené su mes i a yama tur e persona involukrá den e kaso aki i instruí na nan kiko nan tin ku bai deklará. Pastor su telefòn a keda di tap, kaminda outoridatnan por a skucha e kòmbersashonnan i mes ora a hasi detenshon di pastor, mirando ku e no a sigui e regla i kondishonnan.

Segun informashonnan, t’asina ku e akusashon ta basta serio pa loke ta trata labamentu di plaka. Tin asta menshon di kantidat grandi plaka ku  pastor a laba.

Te na e momentunan aki ta basta difísil pa haña informashon di e kaso. Partidonan embolbí ketu bai tin un silensio pa loke ta trata e kaso aki.

Manera ta konosí dia 17 di febrüari último, outoridatnan a arestá pastor Carlos na su yegada aki na Kòrsou for di Colombia. E aresto a tuma lugá na aeropuerto.

Ta trata di un aresto ku a sagudí komunidat Katóliko di Kòrsou. E investigashon di labamentu di plaka kontra di Pastor Carlos ta mas serio di loke hopi ta pensa, ku Ministerio Públiko ta preferá di tin e pastor den detenshon ku e ta den libertat.

Den mayoria kaso ta pa no perhudiká e investigashon andando, dor ku e akusado por tin kontakto ku supuesto testigunan ku por stroba e investigashon, lokual esaki tabata e kaso. NOTA: Texto ta scirbi den Papiamento fonetico di Corsou.