Trump na Mark Rutte di OTAN: paisnan mester paga mas na defensa

WASHINGTON - E cantidad di paisnan cu ta paga nan parti di gastonan di defensa den OTAN “mester ta mas halto, mucho mas halto,” presidente di Merca Donald Trump a bisa mientras e tabata sinta banda di e hefe di OTAN Mark Rutte den e Oficina Oval diahuebs.

E peticion di Trump no ta un sorpresa. Su peticion number un na Europeo y Canadesnan pa hopi tempo tabata pa gasta mas sen na defensa.

Nan mester tin como meta pa comprometé 5% di nan producto interno bruto na gastonan di defensa - un cifra cu ni Merca no ta alcansa, e secretario di Defensa di Merka, Pete Hegseth, a bisa luna pasa.

Danki na su menasa cu Merca lo no sostene paisnan Europeo cu no ta cumpli cu e meta mandatá di 2% di GDP pa defensa, “placa a drenta y OTAN a bira mas fuerte,” Trump a afirma.

Pero esei no ta suficiente. Pa loke ta trata sosten na Ucrania, “Nos ta den pa $300 biyon y [Europeonan] ta den pa $100 biyon”, el a ripiti, aunke e cifranan ey no tin prueba. “Nos mester iguala,” el a sigui bisa.