A honra 3 polis pa a logra de-escala situacion peligroso durante Jouvert Morning

MACUARIMA -  Fin di luna di februari 2025, altocomisario Arnhem a yama tres colega policial pa presenta na Warda di Polis Santa Cruz pa honranan personalmente pa nan accion relampago y eficaz. Durante di Parada di Jouvert Morning a sosode un tiroteo net patras di Julio’s bar na San Nicolas. Na e momento ey tabata tin un multitud di persona gosando di Jouvert Morning, y pa colmo e parada tabata pasando na momento di e tiroteo.

Aki tabata na unda cu tres agente policial di fam Nicholson, de Castro y Dayton a drenta den accion. Tabata momento nan crucial na unda den un par di seconde mester a actua. Den nan accion policial pa nan sorpresa, a nota cu e sospechoso tabata tin un arma di candela den su man y tabata den direccion di e agente policialnan menciona. Den un forma tactico, eficaz, veraz y cu firmesa a sa di actua y a pone sospechoso na vloer y na boei mesora.

Pa motibo di esaki altocomisario Arnhem ta mira e importancia di duna balor y honra e tres agente policialnan aki cu e titulo di mas halto di gratitud cu ta e “oorkonde”. Cu e documento aki ta pone un balor extra den nan carera policial.

Arnhem a gradici e tres coleganan aki pa nan actuacion y ta duna un balor agrega na nos Cuerpo Policial Aruba pa asina di e forma aki sigui mantene nos comunidad sigur y trankil!