A prolonga detencion di chauffeur di prome minister Wever- Croes

ORANJESTAD – Diabierna merdia, un huez comisario a dicidi pa no solamente prolonga e detencion di e chauffeur di prome minister demisionario Evelyn Wever Croes, esta S.K, sino a mande mesora pa KIA tambe. Normalmente ora cu un persona keda deteni, inicialmente e ta keda 2 pa 8 dia den un cel di polis, y ta ora cu prolonga e detencion dos biaha mas, ta manda e persona KIA. Tin excepcion claro, y e biaha aki tabata e biaha ey. 

E CASO

Tabata diamars ultimo cu ministerio Publico a informa cu polis a detene e homber K. relaciona cu un investigacion cu tin andando di delitonan sexual. Durante e registro den cas di K. na Papilon a confisca cargadornan di informacion, como tambe seis arma di candela y un cantidad considerable di municion. K. ta ambtenaar di funcion y durante periodo di gabinete Wever-Croes 1 y 2, ta fungi como chauffeur pa prome minister di Aruba Evelyn Wever-Croes.  Noticiacla a compronde cu e ta un miembro di club di tiramento, y cu e armanan lo ta pertenece na e club aki. 

SHOCK

Despues di un dia, prome minister demisionario Wever-Croes a comenta cu e la keda den shock pa e noticia, y cu e ta laga husticia haci su trabou. E la bisa mesora cu como chauffeur, e sospechoso a haci semper un bon trabou. 

Ministerio Publico a bisa di lo no duna mas detaye na e momento aki pa garantiza e integridad di e investigacion