Wardacosta a stop buskeda activo di Venezolanonan perdi riba laman

WILLEMSTAD.- Wardakosta a stòp ku búskeda aktivo di e venezolanonan pèrdí riba laman for di djadumingu pa djaluna último. Djaluna a bira konosí ku un lancha ku basta venezolano ku a sali Venezuela direkshon pa Kòrsou, a bòltu. Konsekuensia di esaki ta ku a logra di reskatá 10 persona i 1 (un ) hende muhé a fayesé ora el a yega hospital. Den deklarashon pa EXTRA, bosero di wardakosta, sra. Shalick Clement a duna di konosé ku meskos ku djamars, djárason tambe for di den oranan di mainta te ku ora solo ta bai baha, wardakosta su helikòpter i helikòpter di e barku di marina Groningen, a realisá búskeda di e personanan pèrdí riba laman. E búskeda tabata konsentrá riba un área basta grandi entre Kòrsou i Aruba i tambe na kosta di Aruba. Lamentablemente durante e akshon di búskeda, no a topa niun hende mas.

Despues di evaluashon di e situashon, ayera wardakosta a disidí pa no sigui ku e búskeda aktivo mas. A pasa p’e fase di búskeda pasivo. Esaki ta enserá ku durante di patruya regular di nan unidatnan, ta keda monitoria e situashon. Tambe wardakosta a emití un notifikashon na tráfiko marítimo, esta na tur barku i boto ku ta pasa den nos área, pa si akaso nan tuma nota di algu, nan notifiká wardakosta. Si tin hende ku subi laman i a mira algu tambe por mèldu wardakosta na number 913 òf via whatsapp 5999 5100913. Wardakosta ta deseá famia i amigu di esnan pèrdí, hopi forsa. NOTA: Texto ta scirbi den Papiamento fonetico di Corsou.