Merca ta lansa guera comercial temi: Canada y China a dal bek mesora

NEW YORK - Invoerrechten di importacion di Merca riba productonan for di Mexico, Canada y China ta drenta na vigor awe. E tarifanan contra Mexico y Canada a wordo posponi inicialmente ora cu Mexico, entre otro, a cuminsa estrecha e controlnan na su frontera cu Merca. Awor Presidente di Merca Trump ta bisa cu “no tin espacio mas” pa paisnan evita e invoerrechten.

Inmediatamente despues di e declaracion di Trump, Canada y China a anuncia cu nan lo impone nan propio invoerrechten riba productonan Mericano. Esaki ta parce di ta e comienso di e temi guera comercial mundial.

Esaki ta nifica cu companianan mericano cu ta importa cierto mercancia for di Canada, Mexico y China awor lo mester paga belasting adicional riba nan. Productonan di paisnan bisiña di Merca ta someti na un impuesto di 25 porciento, mientras cu productonan Chines ta someti na impuesto di 20 porciento; un redoblacion di e 10 porciento introduci anteriormente.