DUO: Studiantenan Caribense ta bai Hulanda miho prepara

ORANJESTAD - Di 10 di maart te cu 11 di april 2025, Dienst Uitvoering Onderwijs (DUO) ta hasi un bishita di trabou na e área caribense. Durante e bishita lo habri oficinanan di servicio temporal. Tambe DUO ta organisa encuentronan di informacion tocante financiamento di estudio. Durante esakinan ta pone atencion tambe na con studiante, cu e number di servicio pa ciudadano (burgerservicenummer (BSN)) cu el a ricibi, por prepara su mes mas miho riba su estudio na Hulanda. 

Ora studiantenan pidi financiamento di estudio, automaticamente nan ta ricibi un BSN tambe, entrante prome di april 2024. Cu esaki, prome cu nan biaha pa Hulanda, studiantenan por cuminsa regla un DigiD, cu cua nan por drenta den websitenan di gobierno hulandes. Asina studiantenan por cuminsa tira bista entre otro riba montante di nan financiamento di estudio. Tambe nan por cuminsa traha cita na algun municipio pa inscripcion den e municipio caminda nan ta bai biba. Ademas ta posibel tambe pa habri un cuenta di banco ‘online’ cerca algun banco. ‘Nos a ripara cu desde cu studiantenan Caribense ta ricibiendo un BSN, nan ta biniendo Hulanda miho prepara’, segun Monique Hoogerwerf, coordinada di area caribense na DUO. ‘Ta dushi pa mira cu pa e motibo aki nan por cuminsa mas miho.’

ENCUENTRONAN DI INFORMACION

DUO, di 10 di maart te cu 11 di april, ta presente atrobe riba tur e islanan caribense – Saba, Sint Eustatius, Sint Maarten, Aruba, Corsou y Boneiru – pa duna informacion tocante estudio na Hulanda. Banda di informacion tocante financiamento di estudio y BSN, futuro studiantenan y nan mayornan ta tende tambe tur cos tocante asuntunan practico cu nan mester regla.

OFICINANAN DI SERVISIO TEMPORAL

Ademas DUO ta habri oficinanan di servisio temporal riba cada isla, caminda studiantenan por acudi cu pregunta tocante nan financiamento di estudio of otro asunto relaciona cu estudio. Aki ex studiantenan tambe por haña informacion tocante pago bek di nan debe di estudio. 

UN OFICINA DI SERVISIO PA UN AÑA LARGO NA CORSOU

Pa Corsou tin algo otro plania; E primavera aki DUO ta habri un oficina di servicio aya pa un periodo di prueba di un aña. E oficina aki ta brinda sosten extra na futuro studiantenan y personanan cu un debe di estudio, pa por brinda nan servicio personalisa durante henter aña. E colaboradonan ademas ta bay duna informacion na scolnan tambe. 

Mas informacion tocante e encuentronan di informacion y e oficnanan di servicio temporal por haña riba duo.nl/bezoekcariben.