Lo dura un luna mas prome cu por ‘los’ e lista di ministernan pa e gobierno nobo

ORANJESTAD – Lo dura por lo menos un luna mas prome cu e nombernan pa minister di e proximo gabinete bira conoci. Asina e dos formadornan Croes y Eman a bisa na salida di nan audiencia cu gobernador SE Alfonso Boekhoudt. Esaki pasobra manera cu Noticiacla a premira y splica tambe den un analisis anterior cu e proceso di screening lo tuma mas tempo cu normal. Algo cu awe gobernadora a ‘recorda’ e dos formadornan. Un dia anterior ainda un di e formadornan, Eman den e caso aki, a indica cu pa comienso di maart, hasta bisando 1 di maart e gobierno aki lo ta cla. Algo cu awor tin cu cambia, mirando cu cos ta bay tarda mas. 

KICO A HACI TUR E TEMPO ANTO

E lista ta conoci si, pero pa gobernador, y pa asina duna e proceso di screening tempo pa por keda cla. Y pa evita cu nombernan keda anuncia cu chens pa algun keda afo, y cu esaki bira conoci ken tur no a pasa. Pa evita esaki, ta opta e ora pa no divulga e lista di nomber, primordialmente pa partido AVP, mirando cu pa FUTURO, e nombernan ta un secreto publico, ya cu ta conoci cu eynan Gerlien Croes y Geoffrey Wever mes lo ocupa e dos posicionan cu nan ta haya den e gabinete.