PPA y FUTURO a pidi reunion publico pa trata e caso tragico cu a costa bida di Lanoy

ORANJESTAD - Fraccionan di PPA y FUTURO a entrega un peticion pa un reunion publico riba e sucedido di siman pasa cu a sacudi nos comunidad  Segun e carta, PPA ta boga pa mediante un mocion pone fondonan disponible pa ekipa cuerpo policial cu entre otro “bodycam” pa su miembronan. 

Segun lider di fraccion di PPA, Otmar Oduber, e peticion ta papia pa su mes y e meta di e reunion ta pa trece trankilidad y confianza den nos comunidad, asegurando transparencia y objetividad den e investigacion andando, pero tambe haci un maximo esfuerzo pa evita cu algo asina por ripiti su mes. Te cu publicacion di e articulo aki, e carta tabata falta un firma mas, pa e peticion bira ‘legal’. Conforme regla di Parlamento, un peticion pa reunion mester di sosten di por lo menos tres firma di tres parlamentario den Parlamento.