Arnhem: Polis tin medida di precaucion awe pa garantisa dignidad di e entiero di e hoben Lanoy

ORANJESTAD – Awe diabierna atardi, ta tuma lugar e entierro di e hoben cu diadomingo a fayece despues di un persecucion cu polis. Manera ta conoci, a resulta cu e victima a fayece despues cu e polisnan envolvi a los varios tiro riba e hoben, cu consecuencia fatal. E caso a impacta comunidad y un di e resultadonan ta cu pa awe durante entiero, ta spera un multitud di hende pa mustra nan sosten pa cu e famia. 

PRECAUCION DI POLIS

Noticiacla a compronde di Cuerpo Policial cu polis a tuma tuma medidanan di precaucion adicional “pa garantisa e dignidad di e entiero di e defunto y e famia”. “Ademas nos ta extra alerta mirando e situacion y sentimentonan den sosiedad” Alto Comisario di polis Ramon Arnhem a bisa noticiacla diabierna mainta.

MANIFESTACION

A compronde cu ta organisando un tipo di manifestacion pa esnan cu ta simpatisa cu e victima, por bin mustra esaki. A pidi pa bin bisti na blanco unda cu durante di entierro di e hoben, lo mustra sosten den un forma pacifico.