Hoo: No ta prome biaha cu biahero cu a wordo nenga entrada na Aruba, ta critica esaki

ORANJESTAD _ “Ta comprendibel cu e biaheronan cu a wordo nenga entrada na Aruba no ta contento y kier expresa nan frustracionnan den cualkier forma. Esaki ta sosode entre otro den forma di alegacionnan falso y/of circunstancianan exagera cu ta distorciona e berdad di loke en realidad a sosode na nan bentaha”. Asina e hefe di imigracion di Aruba Andrew Hoo a bisa Noticiacla como reaccion riba e articulo di dialuna cu e cabez:   “Colombiano ta wordo nenga acceso na oficina di imigracion di Aruba. “Nos tabata un katibo.”  

KICO A PASA

Manera cu Noticiacla a raporta un dia anterior, un grupo di Colombiano cu a yega Aruba, a reclama despues cu nan a haya nan mes mal sirbi door di personal di imigracion y no kier a laga nan drenta, aunke segun nan, nan tabatin tur documento na orden. Nan a lansa nan critica na prensa Colombiano, cu a yega noticia internacional. Riba esaki imigracion di Aruba a reacciona un dia despues. 

E PROCESO

Segun Hoo, Inmigracion Aruba (IA) ta encarga cu e proceso di imigracion, principalmente na aeropuertonan y wafnan maritimo. IA ta tèst kada biahero kontra e rekisitonan di entrada. Meta di esaki ta pa yega na un supervision y control optimal y eficiente di e fronteranan di Aruba. Esaki ta wordo alcansa door di enforsa e Ordenansa Nacional di Admicion y Expulsion (LTU) y e diferente reglamentunan di ehecusion. “Un momento di prueba ta e momento cu e pasahero a yega na aeropuerto y haf di laman” Hoo ta sigui bisa. Un parti significativo di e control di frontera terestre di Aruba ta concentra na Aeropuerto Internacional Reina Beatrix: un aeropuerto internacional cu ta maneha mas o menos dos miyon pasahero anualmente. “Oficialnan di Control di Frontera di IA ta e prome obstaculo cu un pasahero ta enfrenta ora di drenta Aruba via aeropuerto”.

NO TA PROME BIAHA CU BIAHERO TA CRITICA 

Segun Hoo, no ta prome biaha cu biaheronan ta critica e proceso ora cu nan yega. E ta mustra cu na frontera, oficialnan di imigracion ta wordo confronta regularmente cu biaheronan cu, segun Hoo, aunke nan (e biaheronan) ta cumpli cu e condicionnan pa admision (di acuerdo cu articulo 4 di e decreto di admision 2009 y tambe e disposicionnan den articulonan 7, prome y di dos paragraaf, of articulo 8, prome paragraf, di e decreto di admicion 2009), e problema ta cu ora e ofisina di imigracion puntra nan, adres residencial permanente ni tampoco nan por demostra e proposito di nan estadia. “Esaki ta un indicasion fuerte cu e biahero(nan) enbolbi posiblemente lo por caba den e circuito ilegal” Hoo ta sigui bisa.

ARUBA TA DEPENDE DI TURISMO PERO TIN REGLA ESTRICTO

Ademas, Hoo ta mustra cu IA ta reconoce cu Aruba ta hopi dependiente di turismo y ta boga pa yama bon bini na tur biahero mundialmente di acuerdo cu exigencianan legal. Tin un politica interno estricto pa loke ta trata e trato di biaheronan door di trahadonan transfronteriso. “Den caso cu un biahero(nan) no por wordo admiti na Aruba, conforme regulacionnan legal y procesonan interno di trabao, e biahero(nan) lo wordo saca un decision cual e mester firma hunto cu e oficial di frontera”.

POR NENGA ENTRADA 

Y finalmente, analisisnan realisa en coneccion cu implementacion di e instrucion di politica cu ta contene condisionnan pa nenga entrada na frontera aereo ta mustra cu apesar di tur esfuerso pa combati e fenomeno di residencia ilegal of “overstayers”, e cifranan ta sigui aumenta. Riba e imagen inclui den e relato aki, cu a wordo tuma dia 10 di februari 2025, ta mustra e cantidad di biaheronan permiti pa drenta Aruba cu no a sali bek.