Colombiano ta denuncia maltrato na oficina di imigracion di Aruba: A trata nos manera cacho

BOGOTA – Un grupo di ciudadano Colombiano a keda deteni pa agentenan di imigracion.Esaki segun e portal pluralidadz.com.  Segun e relato, no ta specifica mucho si di ki tempo esaki a sosode ni cu cuanto hende. Solamente cu un grupo di agente di biahe Colombiano a raporta di ta victima di trato inhusto y arbitrario di autoridadnan di inmigracion di Aruba. Loke ta hala atencion, ta cu e accion aki a logra hala atencion di medionan Colombiano, poniendo un tinte negativo riba nos servicio di imigracion. 

KICO A PASA

Segun e relato, nan a bisa cu na yegada na e aeropuerto di e isla, nan a wordo nenga entrada sin un splicacion valido y sin e oportunidad pa demostra cu nan a cumpli cu tur rekisito di entrada. Nan ta bisa cu autoridadnan di imigracion na Aruba a stroba nan di drenta e pais

SUFICIENTE 

E grupo, segun e relato, ta sigura cu nan tabata biaha cu reservacion di hotel confirma, pasashi di regreso y prueba di suficiente fondo pa nan estadia. Sinembargo, ora nan a presenta un screenshot di e reservacion na imigracion, nan a wordo bisa cu nan mester di confirmacion mas detaya.

“Nan a bisa nos cu nan mester a mira e reservacion miho, cu e screenshot tabata inutil,” un di esnan afecta a bisa.

E situacion a bira mas compleho ora cu nan a wordo hiba na un sala di espera hunto cu otro personanan cu despues a wordo notifica di nan deportacion.

“Nunca nan no a yama nos, ora nan a yama tur hende pa sali y puntra, ‘Unda nan ta hiba nos ’? “Nan no a duna nos un carta,” un di e biaheronan a splica.

Tambe el a menciona cu ora el a puntra riba su situacion, un agente di imigracion a inform’e cu nan no a wordo interna.

Como contesta, el a bisa cu e no a wordo informa di nada di antemano y cu e no a ni haya e oportunidad pa prueba su status como turista, apesar di tin tur su documentonan na ordo.

Di acuerdo cu su relato, autoridadnan di imigracion a argumenta kc e hotel caminda supuestamente nan a keda no tabatin ningun reservasion riba su nomber.

“Nos reservacion a wordo haci atrabes di e plataforma di nos agencia di biahe, e mesun cu nos a usa pa maneha biahenan pa 125.000 turista,” el a bisa.

Tambe el a menciona cu el a bishita Aruba e aña anterior riba e mesun fechanan y pa e mesun periodo di tempo, sin ningun problema.

Colombianonan a expresa nan indignacion pa loke nan ta considera un trato humiyante y discriminatorio. “Nan a saca nos manera cacho. Ta parce cu nan ta djis cumpli cu un quota di deportacion.”

Parce cu mas y mas ciudad ta restringiendo e entrada di Colombianonan, posiblemente pa motibo di sospecho di actividadnan ilegal of documentacion iregular. Dilanti di e situacion aki, hopi Colombiano ta haya nan mes obliga di enfrenta trato hostil.