Segun Gerlien Croes, ta Gobierno tin tratamento di presupuesto 2025 tranca

ORANJESTAD – Segun presidente di Parlamento Gerlien Croes, ta gobierno tin tratamento di presupuesto tranca ainda. Asina por compronde di un carta cu e la manda pa gobierno y CAFt dialuna 3 di februari, e ta informa gobierno di esey. E carta ta ta un “recordatorio na Gobierno di Aruba cu e Nota di Contestacion (Nota naar Aanleiding van het Verslag) riba e presupuesto 2025 no a wordo ricibi ainda na Parlamento di Aruba” Croes ta bisa. “Sin e nota aki e proceso di tratamento di e ley regardando presupuesto di pais Aruba pa aña 2025 no por wordo inicia” e presidente di Parlamento ta finalisa bisando. 

CAFt CU ULTIMATUM

Tabata mas prome awe cu noticiacla a raporta riba e carta cu e colegio di supervision di Aruba CAFt a manda pa gobierno di Aruba, informando nan cu tin un deadline di 31 di maart 2025 pa Parlamento aproba e presupuesto di pais Aruba pa 2025. Gobierno a bisa mesora cu no ta nan falta, pasobra nan a entrega e presupuesto na tempo aña pasa na Parlamento. CAFt ta bisa cu no por usa e ‘excusa’ di formacion di gobierno, pa no tin e presupuesto aproba. Pues, e wega di culpa otro a cuminsa.