CAFT: Presupuesto di Aruba mester ta aproba mas tarda 31 di maart 2025!

ORANJESTAD – Presupuesto di pais Aruba pa 2025 mester wordo aproba no mas tarda cu 31 di maart 2025. Asina e colegio di supervision financiero pa Aruba CAFt ta bisa gobierno den un carta, cual carta a keda publica riba nan portal e siman aki. E no ta bisa si, kico e consecuencia ta si e fecha menciona pasa, y cu no tin presupuesto aproba. Legalmente e instrumentonan cu CAft tin pa haci algo, ta limita. E unico forma cu e por actua realmente, ta si Aruba no cumpli cu e normanan di presupuesto. 

ORDENANSA 

E colegio a recorda cu e Ordenanza di Supervision Financiero Temporal Aruba (LAft) ta stipula cu Aruba mester entrega e presupuesto adopta pa e siguiente aña presupuestario na CAft  pa conseho prome cu 15 di december. Asina ta garantisa cu un presupuesto legalmente valido ta na vigor entrante 1 di januari proximo. “ Te cu awe ainda CAft no a haya e presupuesto adopta pa 2025.   

FORMACION DI GABINETE NOBO

“ E formacion di e gabinete no mester ta un motibo pa retraso” e colegio ta sigui bisa.  “Unabes cu e presupuesto a wordo adopta, e gabinete nobo por implementa e consecuencianan financiero di su propio politica desea pa medio di e prome presupuesto supletorio”.

CONSECUENCIA 

E fayo pa aproba un presupuesto adoptá no solamente tin consekuensianan pa e derechonan presupuestario di e Estadonan, pero tambe por tin consecuencianan financiero mas amplio, manera restriccionnan pa drenta den obligashonnan nobo. Esaki ta preocupante, ya cu no por lanta fiansa nobo, mientras cu Aruba tin un obligacion di pago bek di mas o menos AWG 600 miyon na 2025. 

REACCION GOBIERNO

For di un reaccion di gobierno diamars riba e carta publica di CAFt, por compronde cu no ta e falta di gobierno demisionario actual ya cu nan a entrega e presupuesto na tempo aña pasa. Di otro banda, ta e gobierno demisionario mes ta esun cu a ‘benta’ su mes abou, cu nos ta den e situacion aki. Gobierno como reaccion, ta sigui bisa si cu e ta spera cu Parlamento nobo sa di haci su trabou y aproba e presupuesto mas liher cu ta posibel. Pa e carta di CAFT, click AKI.