Prome migrantenan for di Merca na caminda pa Guantanamo Bay

WASHINGTON - E prome vuelo di migrantenan cu a drenta Merca ilegalmente ta na caminda pa Guantanamo Bay. Cas Blanco a informa esaki despues di informenan di medionan Mericano. Un avion militar mester a transporta alrededor di dies persona pa e base naval di Merca na ost di Cuba.

Presidente Trump a anuncia siman pasa cu e kier usa e base pa detene cierto imigrantenan cu a drenta Merca ilegalmente. “Nos tin 30.000 kama na Guantanamo pa warda e pió stranheronan criminal cu ta menasa e pueblo mericano,” el a bisa.

Minister di Defensa Hegseth a yama Guantanamo un “lugar perfecto” pa aloha migrantenan. Den e ultimo dianan, trupanan Mericano adicional a yega na e base pa prepara e centro di detencion – un sitio separa di e infame prizon. Segun medionan mericano, lo tin solamente espacio pa alrededor di 120 migrante.

Mientras tanto, Mexico ta tratando di evita cu su compatriotanan ta termina den centronan di detencion na Cuba. Den un mensahe pa Embahada di Merca na Mexico, el a bisa cu lo tuma bek tur e migrante Mexicano cu Merca deporta.