Ministerraad a pidi Geoffrey Wever draai bek decision pa aumenta tarifa di gas

ORANJESTAD – Diamars mainta, conseho di minister di gabinete Wever-Croes a pidi minister Geoffrey Wever pa reconsidera su decision di aproba e aumento di tarifa di gas di Arugas. Asina prome minister Evelyn Wever Croes a confirma pa Noticiacla diamars mainta. Ademas, segun Wever-Croes, a pidi e mandatario pa sigui na mesa cu e compania y explora otro alternativanan pa en bes di hisa e tarifa pa e consumidor, pa gobierno tuma e aumento pa su cuenta y asina duna alivio na e consumidor. “ Minister Wever ta bai hasi e calculacionnan y lo informa Ministerraad” Wever-Croes a sigui bisa. 

E ta un decision di e minister di Asuntonan Economico pa cual e no mester di aprobacion di Ministerraad. Pero mirando e efecto di e decision aki riba cuidanonan, especialmente esnan di menos recurso, Ministerraad a pidi e minister pa busca un otro solucion.

Tabata ayera cu e decision a keda anuncia pa aumenta tarifa di gas na Arugas, cual noticiacla a publica tambe. Pero mirando e reaccion cu esaki a crea, a opta pa trece cambio den esaki.