MEXICO CITY - Presidente di Mexico Claudia Sheinbaum a manda un carta pa Google cu ta contesta e desicion di e gigante di technologia pa cumpli cu e ordo di presidente mericano Donald Trump pa cambia e nomber di Golfo di Mexico como Golfo di Merca.
Presidente Sheinbaum a mustra e carta na reporteronan diahuebs bisando, “Den caso di Mexico, unda nos ta completamente soberano? Den e area establece como 12 miya nautico for di e liña di costa, y esaki ta conta pa tur pais rond mundo.”
“Si un pais kier cambia e designacion di algo den lama, e lo aplica solamente te cu 12 miya nautico. E no por ta aplica na e resto, den e caso aki, e Golfo di Mexico. Esaki ta loke nos a splica den detaye na Google.”
Refiriendo na un contraproposicion anterior cu e la haci na Trump pa cambia nomber di Merca, Sheinbaum a agrega, “Na final, nos a pidi pa ora un hende busca ‘America Mexicana’ den e motor di buskeda, e mapa cu nos a presenta anteriormente mester aparece.” E mapa ey, di 1607, a etiketa partinan di Nort America “Mexico America” y a wordo mustra durante un conferencia di prensa na cuminsamento di e luna aki.
MIAMI - Riba Google Maps na Merca, Golfo di Mexico awor ta wordo yama Golfo di Merca. E cambio ta resultado di un orden ehecutivo firma pa presidente di Merca Trump luna pasa.
CARACAS - Venezuela a manda dos avion pa Merca pa busca compatriotanan cu ta biba eynan ilegalmente. Segun e agencia di noticia AP, esaki ta indica un posibel mehoracion den e relacionnan entre e dos paisnan. Por lo menos un avion awor a yega aeropuerto di Maiquetia, net panort di e capital Caracas.
BRUSELAS – Lider di UE, Ursula von der Leyen, ta adverti presidente di Merca Donald Trump di un contrareaccion despues di su decision di impone un tarifa di importacion di 25 porciento riba hero y aluminio Europeo. “E tarifanan inhustifica aki riba Union Europeo lo no keda sin contesta y lo conduci na contramedidanan fuerte y proporcional.”
BRUSELAS – Comision Europeo a reacciona cu cautela riba e anuncio di presidente di Merca Donald Trump di impone invoerrechten nobo di 25 porciento riba hero y aluminio. Sinembargo, Bruselas ta adverti e mericanonan: “Nos lo respondé pa proteha e interesnan di companianan, trahadonan i consumidonan Europeo contra medidanan inhusto.”
JUNEAU- Trahadonan di rescate na Alaska a lansa un buskeda despues cu un avion no a logra yega su destinacion. Tabatin diez persona abordo: un piloto y nuebe pasahero.
WASHINGTON - Promé Minister di Israel Benjamin Netanyahu a sostene proposicion di presidente Mericano Donald Trump pa “tuma over” Gaza, mientras cu e ehercito di Israel a haya ordo pa prepara plannan pa cantidad grandi di Palestino bandona e teritorio.