Aruba Bank den cuadro di celebracion 100 aña a haci un donacion di AWG 100,000 na SABA

Posted on 01/30/2025 3:26 pm AST | Updated on 01/30/2025 3:28 pm AST

ORANJESTAD - Den cuadro di su celebracion di 100 aña, Aruba Bank ta confirma su compromiso pa desaroyo den nos comunidad cu un donacion di AWG 100,000 na Stichting Algemene Bejaardenzorg Aruba (SABA). E contribucion aki ta confirma e dedicacion di Aruba Bank pa atende e necesidadnan di sectornan vulnerabel, mientras cu e ta fortifica su rol como un lider socialmente responsabel na Aruba. Tur luna durante 2025 Aruba Bank lo haci un donacion special den diferente area cu ta un necesidad den nos comunidad.

E donacion oficialmente entrega pa Edseline Leer - Semeleer, Head of Retail Banking di Aruba Bank, durante un ceremonia special caminda a duna un discurso inspirante subrayando e importancia di e colaboracion. Edseline a comparti:

" Den nomber di Aruba Bank, ta un honor pa nos ta aki na SABA, pa haci nos prome donacion den cuadro di nos celebracion di 100 aña di existencia. Cumpli un siglo ta testigo di e confiansa y e relacion cu nos a forma cu nos comunidad y organisacionan di Aruba. Mientras nos ta celebra e ocacion special aki, nos ta reflexiona riba e impacto berdadero cu nos contribucion ta crea den nos comunidad. 

Ta cu gran orguyo nos ta aporta cu un donacion di 100 mil florin na Stichting Algemene Bejaardenzorg Aruba (SABA). SABA tin un rol esencial den mehora bida y promove bienestar pa nos grandinan. Boso dedicacion ta inspira nos, y e contribucion aki ta refleha nos compromiso pa sostene SABA su mision y pa yuda eleva e calidad di bida pa nos grandinan na Aruba. Nos ta compromete pa sigui crea un diferencia den bida di esnan cu nos ta sirbi. Hunto, nos por crea un futuro mas briyante y saludabel pa Aruba. Masha danki pa duna nos e oportunidad pa sera conoci un tiki mas di cerca cu SABA, y pa aporta na boso diferente iniciativa plania durante 2025.”

Sulima Geerman, PhD, Directora di SABA, a ricibi e donacion cu hopi gratitud y a expresa su agradicimento pa e contribucion significante di Aruba Bank.

  • Powered by SETAR