Dos fraccion den Parlamento ta contra pa gobierno sigui negosha riba RAFt

ORANJESTAD – Por lo menos 2 fraccion den Parlamento ta contra pa e gobierno actual sigui negosha cu Hulanda riba e rijkswet RAFt. Asina a bira conoci diahuebs mainta durante e bijeenkomst unda cu minister president Wever-Croes a duna un actualisacion di e situacion. E dos partidonan cu ta contra pa continua negosha ta PPA y AVP. Esaki mientras cu PPA kier pa tin un front uni pa confronta Hulanda riba e tema aki. 

GOBIERNO LO SIGUI NEGOSHA

Mirando cu e fraccionan den Parlamento no kier y of por a comparti nan ‘gevoelens’ riba e tema, bisando cu esaki ta un bijeenkomst y no un reunion publico, Wever-Croes, e prome mandatario a informa cu e lo sigui negosha e ora. “Mi a informa nan tambe cu si mi no haya otro notificacion di Parlamento, mi ta sigui negocia den cuadro di e mandato otorga na mi pa e Parlamento anterior. Si e Parlamento actual kier cambia e mandato nan por haci’e durante un reunion publico y informa gobierno” Wever-Croes a sigui bisa.

HISTORIA 

Prome Minsiter durante e encuentro a conta e historia di e leynan desde comienso pa asina e parlamentarionan nobo por tin e informacion completo. E mandatario principal a splica riba e situacion cu Aruba tawata aden durante e pandemia unda cu gobierno a wordo forsa pa acepta cierto conceptonan di ley pa por a haya placa. Aruba e tempo ey si a pone e condicion cu e leynan mester bay Raad van State prome ken na su turno a duna conseho basta negativo riba esaki. Tambe Parlamento di Aruba tawata contra, tratando e tempo ey di fraccionnan di MEP, AVP y RAIZ. Pa e motibo ey a sigui negocia cu Hulanda pa bin na algo miho y mas flexibel cual ta loke ta andando actualmente. 

TA NEGOCIANDO DEN E CUADRONAN

E importancia di e reunion informativo di diahuebs mainta segun Wever-Croes, tawata pa Prome Minister comparti unda Aruba ta para na e momento aki. Aki e mandatario a indica cu, ainda no tin e conceptonan den texto y ta depende tambe di e raport di IMF cu lo keda cla pronto. Na e momento ey lo por duna Parlamento mas informacion. Si Aruba ta negociando den e cuadro di e acuerdo, e bestuurlijk akkoord cu a yega cu Secretario di Estado van Huffelen na juni 2024 y tambe den e cuadro di e diferente mocionnan cu Parlamento a duna.

LO SIGUI NEGOSHA NA HULANDA OTRO SIMAN 

“ Mientrastanto nos ta sigui negocia pasobra esaki ta den interes di henter Aruba pa yega na un miho interes di e prestamo. Si stop di negocia awor y warda te ora tin un gobierno nobo no ta den e miho interes di Aruba. A trata di un bon reunion unda hopi informacion a wordo duna. Mi ta aprecia cu Parlamento tawatin e interes den esaki y awor nos tin suficiente indicacion con pa sigui cu e negosacionnan. Otro siman mi lo ta na Hulanda y lo continua cu e negosacionnan”, Prome Minister a indica.