AHATA a reparti 50 mil florin di donacion entre10 organisacion importante den comunidad

ORANJESTAD  —Despues di un aña 2024 productivo y exitoso pa Aruba Hotel and Tourism Association (AHATA), e asociacion a bolbe duna sosten financiero na comunidad cu varios donacion.  Danki na e miembronan di AHATA ta posibel pa alcansa un suma total di AFL 50.000 na donacion.

E donacionnan ta apoya diferente iniciativanan, incluyendo educacion y derecho di mucha, salud mental, proteccion di medio ambiente, bienestar social y bienestar di animal. Di e forma aki AHATA ta sigui contribui na asistencia y proteccion pa varios temanan critico cu ta afecta nos comunidad.

Fundacionnan Beneficia: 

1.      Representantenan di Stichting Hunto, Directora, Dalgis Montalvo, y Director Financiero, Randall Van Trigt a ricibi e donacion cu lo apoya nan centro di salud mental y adiccion. Di e manera aki AHATA ta contribui na nan programa di rehabilitacion, evaluacion psicologico y serviconan di terapia, cu ta yuda haci cuido mental mas accesibel pa personanan den nos comunidad.

2.      Pa Fundacion CasMarie, Voorzitter, Yvonne Escalona, y Coordinator Wellzijn, Jeanine Nicolaas a ricibi e contribucion cu lo asisti nan servicionan di pasa dia, guia, informacion y apoyo na famia pa esnan enfrentado e reto di algun forma di demencia, como por ehempel e malesa di Alzheimer’s. 

3.      Pa Fundacion pa Nos Muchanan, Directora, Natasha Gilkes, a ricibi e donacion, cual lo yuda nan projectonan pa capacita educadornan y nan cursonan di Stimami Guiami, cu ta ofrece informacion na mayornan di con pa miho cria y guia nan yiu. Di e manera aki mas mucha por haya un educacion cu ta aplica derecho di mucha y stimula nan desaroyo optimo.  

4.      Presidente di ScubbleBubbles Foundation, Nichole Danser a ricibi e donacion, pa sostene nan esfuerzonan di conservacion maritimo hunto cu hobennan local, asina yudando restauracion di nos rifnan di coral, cual ta importante pa nos eco-sistema.\ 

5.      Pa Bataya Escolar, Director, Ian Heidweiler, y representate Roy Mezas, a ricibi e donacion pa apoya nan iniciativa nobo cu lo tuma forma di un concurso nacional di scol. E concurso ti como meta pa stimula e desaroyo intelectual y fisico di studiantenan den 6de klas di scol basico.  

6.      Representantenan di Luna Foundation, Fundado y Presidente Zoraida Conijn, y voluntario, Dalton Conijn a ricibi e contribucion cual lo yuda nan iniciativanan pa rescata y rehabilita diferente sorto di animalnan maltrata y abandona, pa asina sigui cuida y defende bienestar di animalnan.   

7.      Director di Red Cross Aruba, Stephen Daal, a ricibi e donacion cu lo apoya nan asistencia humanitario, incluyendo nan servicionan di prome auxilio, casnan di emergencia y programa di asistencia social.  

8.      Representatenan di Stimami Sterilisami Foundation, Presidente, Ewald Biemans, Directora Tina Bislick, y Secretaria, Crescenzia Biemans a ricibi e donacion di AHATA cual lo yuda nan programa nacional cu ta cubri e gasto di sterilicacion di cacho y pushi, asina reduciendo e cantidad di “strays” riba nos isla y promoviendo cuido di mascota responsabel. 

9.      Aruba Conservation Foundation (ACF) a ricibi un donacion y lo dedica esaki na nan esfuerzonan di conservacion di e ecosistemanan natural di nos isla, asina trahando pa conserva e biodiversidad y bunitesa natural di Aruba pa e generacionnan futuro.

10.    Aruba Birdlife Foundation tambe a ricibi un donacion di e asociasion pa yuda cu nan programa di conserva nos Shoco.

AHATA ta gradici e esfuerso continuo y importante di e fundacionnan, reconociendo nan balor y impacto den e bienestar di nos pais. E asociasion ta duna danki na tur su miembronan pa haci e contribucion aki posibel, y ta firme den nan plan pa sigui inverti  den esfuerzonan cuminitario cu ta fortifica Aruba como un lugar vibrante, solidario, y sostenibel pa biba y bishita.