Na Corsou ta dicidi dialuna si lider politico di KEM ta sali liber di prizon

WILLEMSTAD.- Djaluna awor, 20 di yanüari, korte lo tuma desishon riba petishon ku lider di partido KEM, Michelangelo “Lo” Martines a hasi pa suspendé su detenshon. Ayera korte a trata e petishon di Martines pa suspendé su detenshon pendiente tratamentu di su kaso. Korte a indiká ku djaluna e lo tuma un desishon. E desishon ta kai hustamente den e siman ku tin entregamentu di lista di partidonan polítiko. E partido di Martines, KEM tambe ta bai entregá lista.

Dia 5 di novèmber 2024, e parlamentario Martines a keda detené riba sospecho di trafikamentu di droga i labamentu di plaka den e periodo di 2019, 2020 i 2023. E kaso aki ta hiba e nòmber investigashon penal “BLEDA”. Dia 26 di novèmber 2024, wes komisario a demandá i a ordená enkarselashon pa Martines ku 60 dia. Dia 3 di desèmber 2024, Martines a apelá e 60 dia di enkarselashon, i a pidi pa suspenshon di su detenshon. Dia 6 di desèmber e petishon a keda rechasá. Ayera un biaha mas Martines a akudí na korte pa por rekobrá su libertat pendiente tratamentu di su kaso. Manera ariba indiká djaluna korte lo tuma un desishon riba e petishon. Mirando e kantidat di dianan ku Martines tin será, ku tur probabilidat den luna di febrüari e lo mester presentá dilanti mesa bèrdè. Esaki tin di sosodé despues di 3 luna ku e sospechoso ta detené. NOTA: Texto ta scirbi den Papiamento fonetico di Corsou.