Hulanda tambe a baha personal di e embahada venezolano na mitar

WILLEMSTAD/DEN HAAG - Minister Veldkamp di Asuntunan enkargá ku Asuntunan Eksterior a instruí Venezuela pa baha e kantidat di personal diplomátiko na Hulanda na mitar, esta, for di kuater na dos. Esaki e Minister a skibi den un karta pa Tweede Kamer.

E medida diplomátiko akí ta un reakshon riba e medida ku Venezuela a tuma  riba Hulanda, esta, ordená ku mester baha e kantidat di personal diplomátiko na mitar.

Esaki a pone ku Hulanda mester a baha tres di e seis personal di embahada ulandes ku tres di e seis empleadonan i a ordená nan ku nan mester bandoná e pais den 48 ora. Pa diplomátikonan ku ta keda, reglanan estrikto a keda apliká. Por ehèmpel, nan mester pidi pèrmit adelantá si nan ke move mas ku 40 kilometer for di Sentro di Caracas. Pa paisnan Francia i Italia tambe mesun medidanan a keda imponé.

E medidanan akí a bin despues ku Gobièrnu venezolano ta di opinion ku e paisnan menshoná a tuma un posishon hostil, abase di nan krítika riba e elekshon kaminda ku Nicolás Maduro a huramentá komo Presidente pa di tres temporada.

Tantu e oposishon komo e paisnan oksidental ta señalá ku e elekshonnan no tabata hustu.

Minister Veldkamp a oponé e restrikshon di move liber i a duna di konosé ku e lo konsiderá "medidanan adishonal", si e restrikshon di move liber pa diplomátikonan ulandes na Venezuela keda vigente.

Hulanda a distansiá for di e tendensia ku nan lo a interferí den asuntunan interno di Venezuela i asina duna sosten na gruponan ekstremista.

Finalmente Veldkamp a duna di konosé ku "Reino Ulandes ta komprometé ku derechonan humano i e restourashon di demokrasia i e estado di derecho na Venezuela". NOTA: Texto ta scirbi den Papiamento fonetico di Corsou.