ORANJESTAD - Departamento di Salud Publico di Aruba (DVG) a tuma nota di un informacion publica pa RIVM Hulanda riba casonan di Hepatitis A vincula cu e producto ‘Blauwe Bessen’ 1kg di e marca AH. Mesora nos seccion Warenkeuring en Hygiëne a subi caya y haci bishita na algun supermercado specifico conoci pa ta bende productonan procedente di Hulanda. Por informa cu ta unicamente un supermercado ta bende e marca specifico aki cu ta AH na Aruba y desde ayera caba nan a wordo notifica di e problematica cu e producto, pa cual motibo nan a saca tur e productonan for di vriezernan caba. Apesar cu DVG no por a topa cu e producto a conseha management di e supermercado pa verifica cu nan no tin e producto aki warda den warehouse y si esaki ta e caso pa deshaci di esakinan mesora particularmente e batch cu tin expire day april 2025 pa april 2026.
DVG ta haci un yamado tambe na comunidad y na sector hotelero pa controla si nan por tin e producto aki den nan disposicion. Si esaki ta e caso ta haci un apelacion pa no consumi e producto y deshaci di esaki mirando cu e por ta contamina cu e virus di hepatitis A. Te na e momento aki DVG no a registra ningun caso di hepatitis A cu por ta vincula cu e producto aki, pero lo sigui monitor esaki di cerca.
Hepatitis A ta wordo ocaciona pa un virus cu ta plama di hende pa hende na momento cu un persona ingeri cuminda of bebida contamina cu e virus procedente di un persona infecta cu a bay wc y sea no a laba su man of no a laba esaki suficientemente bon. E virus di Hepatitis A ta ocaciona inflamacion di higra y ta duna e sintomanan di diarea, cansancio, keintura, dolor di join, perdida di apetit y sacamento.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na [email protected]
ORANJESTAD – Un dia despues di a bishita Aruba, e barco crucero Rotterdam di Holland America Line, a raporta un brote di malesa gastrointestinal riba su nabegacion actual cu mas cu 100 pasahero malu abordo. Di acuerdo cu e Centronan pa Control y Prevencion di Malesa (CDC), Rotterdam di Holland America Line tin 107 invitado malo abordo di su biahe actual cu a sali dia 2 di februari 2025. Segun informe, 12 miembro di tripulacion tambe ta malo.
BOGOTA – Un grupo di ciudadano Colombiano a keda deteni pa agentenan di imigracion.Esaki segun e portal pluralidadz.com. Segun e relato, no ta specifica mucho si di ki tempo esaki a sosode ni cu cuanto hende. Solamente cu un grupo di agente di biahe Colombiano a raporta di ta victima di trato inhusto y arbitrario di autoridadnan di inmigracion di Aruba. Loke ta hala atencion, ta cu e accion aki a logra hala atencion di medionan Colombiano, poniendo un tinte negativo riba nos servicio di imigracion.
ORANJESTAD - Diaranson 13 di Februari 2025, Wikipedia riba Aruba lo lansa oficialmente cu un evento di apertura na Biblioteca Nacional Aruba. E proyecto aki, cu ta dura 18 luna, tin como meta pa educa e comunidad local riba e poder di Wikipedia, forma un comunidad activo pa comparti conocemento, y mustra e herencia rico di Aruba riba un plataforma global.