Analisis: Un danki pa Aña 2024 y un Bon Bini na Aña 2025

Na vispera di un otro aña nobo, ta momento pa analisa, interpreta y visualisa loke ta importante. Pa cuminsa, na nomber di nos cas editorial Wired Media, mi mester gradici cada un di boso, pa e sosten den 2024. Un aña cu sigur tabata largo, of por lo menos a mustra largo. Un aña den cual Noticiacla a cumpli su di dos lustro (10 aña), aunke a opta pa no haci mucho fanfaria rond di esaki. No pa motibo financiero, sino pasobra nos meta tabata otro. Nos a haya e gradicimento necesario, y esey tabata suficiente. Y nos audiencia ta compronde y nos ta mas cu agradecido pa e sosten. Un cos cu tabatin mas cu antes, sigur den e parti final di 2024, tabata e ‘Analisisnan’. E reaccion tabata asina abrumador, cu por spera mas di esaki, mas sigui den 2025!. Nan lo sigui skerpi, bibo y honesto. E berdad sunu. 

CORUPCION DEN POLITICA 

Aña 2024 tabatin hopi noticia, hopi desaroyo, hopi reto, cu a haci e aña uno sigur interesante. Algun noticia cu a resalta, otronan cu tabata menos, pero, noticia tabatin. Loke sigur a domina ta politica un biaha mas, pero den mas forma cu un. Pa cuminsa, e cantidad di politico cu tabata envolvi cu husticia, algun pa un tempo caba, mientras otronan a bin haya nan mes envolvi y otronan cu ta pendiente pa 2025 ainda. Esaki sigur a laga su marca negativo riba e panorama politico. Mandatarionan, sea parlamentario of minister cu a haya nan mes envolvi cu husticia. E ta un señal cu algo ta robez y cu nos mester para keto y mira con ta bay resolve esaki den e proximo aña(nan). Un di e preocupacionan mas grandi di lectornan di Noticiacla pa medio di e resultado di nos encuestanan, tabata netamente esey: Con pa mitiga, of elimina e grado di corupcion den politica. E cantidad cu cual esaki a sosode den 2024, no ta normal. Y di loke ta mustra, por lo pronto, hasta den 2025 esaki lo continua. Si no atende cu e asunto aki, e por te hasta bira algo ‘comun’. Un señal e aña aki cu politica no ta algo ‘atractivo’ mas, pa e mesun motibo aki, ta e problema cu cual TUR partido politico tabatin pa haya candidato pa participa den e eleccion parlamentario. 

ELECCION 2024

Eleccion tabata otro tema cu a domina e parti final di aña 2024 den un forma sorpresivo. Sorpresivo, pasobra e no tabata algo programa pa tuma lugar ainda sino te mitar di 2025. Un caida di gobierno (atrobe), a pone cu hopi a haya un core core, sea cu bo ta den politica of no. E resultado tambe a sorprende hasta e partidonan politico. Esnan cu a haya suficiente voto, a keda sorprendi, y esnan cu a keda ‘elimina’, tambe. E resultado di eleccion awor ta bay tene nos ocupa durante gran parti di 2025. E resultado di eleccion ta uno ‘fastioso’, den sentido cu e partidonan en cuestion, mester ta hopi alerta, cuidadoso y vigilante di nan propio paso y di e contrincante, si nan kier logra algo duradero. Y nos, lo sinta na banda, vigila y analisa y si mester, critica ora cu ta necesario. Prensa como e di 4 poder, tin cu asumi su rol y sigura cu e desaroyo ta uno transparente y husto. Por lo menos, mas husto posibel. Exito na esnan envolvi, y cu sabiduria prevalece y cu nos por haya un gobierno cu ta surpasa tur problema interno, ego y asuntonan externo. 

FUTURO 

Pa loke ta Noticiacla, e tabata un bon aña. Hopi noticia, y tambe e sosten financiero necesario. Pero tambe hopi reto. Den pito final, nos tambe a bira victima di atake cybernetico, pero ta y a trahando riba e situacion pa e daño keda minimo. Comercialmente, nos partnernan a deposita confiansa den nos un biaha mas, pa cual nos ta hopi gradecido. Esey ta mustra cu nos trabou ta bal, y cu tin cu sigui padilanti. Y den 2025, nos lo tin algun cambio mas, cu nos lo anuncia den curso di aña. E morto repentino di colega Johnny Habibe na final di e aña aki, ta un recordatorio, cu bida ta corto, y cu pa cuanto plan y idea tin, materialisa esaki awe, no warda pa mayan, y biba bo bida bon y responsabel. Awe bo tey, mayan bo no sa. Mi mensahe ta pa bo sigui cu nos den 2025, cu tur fe y bendicion y cu bo tin un super aña nobo. Di curazon, danki pa e confiansa y e sosten!. 

Scirbi pa Tito Laclé