Hospital a registra aumento di test diagnostico den November!

ORANJESTAD – Hospital Horacio Oduber a registra un aumento di test  diagnostico den November! Asina e hospital ta raporta den su cifranan mensual. Na november a hospitalisa 842 pashent compara cu oktober cu tabata 878 pashent. Y di e 842 pashent admiti solamente 28.3% tabata admision planea. E promedio di duracion admiti na HOH na luna di november tabata 4.2 dia y e ocupacion di cama tabata 80.4%. Un total di 596 operacion a tuma luga den nos salanan di operacion cu ta similar na luna di oktober (599 operacion). 

Departamento di Emergencia a atende na luna di november 2781 pashent cual 39.9% di pashent no tabata rekeri cuido di emergencia.  A nace na luna di november 31 baby mucha muhe y 40 baby mucha homber (total 71 baby). Y na november Bloedbank Aruba a ricibi un total di 153 donacion di sanger cu ta 35 donacion menos cu na luna di oktober. 

Specialistanan den servicio di Hospital a haci un total di 7567 consulta cu pashent y na Departamento di radiologia a haci un total di 4632 test manera CT scan, MRI, echo etc. cu ta 299 test mas cu na luna di oktober. Un total di 14066 persona a bishita LabHOH na luna di november pa haci nan testnan diagnostico. Y na luna di november un total di 838 pashent a sali for di Hospital y regresa nan cas.