Oduber: Si kier un gobierno di base amplio, PPA mester forma parti di e coalicion

ORANJESTAD – “E tabata un reunion sumamente interesante” tabata e prome reaccion di lider di partido PPA Otmar Oduber na su salida di e reunion cu informador diaranson mainta. E enfoke segun Oduber, tabata riba programanan di partido, pa wak e posibilidad pa por forma un coalicion cu otro partidonan cu tambe a logra asiento den e ultimo eleccion. Oduber ta pensa cu pa tin un gobierno stabil pa duracion largo, e no por bira un coalicion di solamente dos partido sino cu partido PPA tambe mester forma parti di e coalicion. “A base si di e prioridadnan cu nos tin den nos programa, y percura kico e pensamentonan ta di otro partido” Oduber a bisa. Segun Oduber, programa di PPA ta hopi alinea cu e otro partidonan den contienda. A bisa tambe cu cualkier acuerdo cu yega na dje, mester ta acuerdo duro, por escrito pa cualkier coalicion cu ta bay sinta. Y si no logra drenta den gobierno, PPA ta cla pa asumi nan responsabilidad den Parlamento, den oposicion. 

VAKMINISTER POSIBEL PA PPA 

E tema di ministerschap tambe a bin na ordo unda cu Oduber a referi na e sentencia di dia 22 di januari 2025 proximo di su caso Flamingo den cual e ta sospechoso. “Nos lo pone naturalmente un persona cu sea ta un vakminister of cu ta un persona riba nos lista pa carga e responsabilidad”. Ta wak kico e cartera ta prome, pa e ora dicidi cua persona lo pone. Esey ta pa e periodo prome cu e sentencia. Y despues ta dicidi kico ta pasa y si mester, Oduber lo asumi su rol den Parlamento y un otro persona lo asumi e rol di minister.