Na Corsou, parlamentario Osepa ta entrega denuncia contra minister Silvania

WILLEMSTAD.- Ayera Parlamentario Sheldry Osepa di PNP a bai Landsrecherche kaminda el a entregá keho kontra di minister di SOAW/finansa sr, Javier Silvania. Esaki ta pa motibu di lèkmentu di e lista di kobradónan di ònderstant siman pasá durante tratamentu di presupuesto 2025.

Osepa a bisa ku e loke a pasa den parlamentu di Kòrsou siman pasá ta algu hopi mahos. E informashon di 5627 kobradó di ònderstant ta riba kaya i esaki a sosodé bou di responsabilidat di minister di SOAW , Silvania. “Ora analisá esaki, mester hasi investigashon”. Esun ku a duna e instrukshon, Osepa ta konsiderá komo ‘uitlokker’, está ,si abo a duna informashon personal ku ta riba kaya. “E hendenan mester sa ku nan informashon ta konfiabel den komunidat. Mas kondenabel ta esaki, despues di fayo di minister Silvania, e informashon ta riba kaya. A kondená mi, bisando ku ta mi persona a saka e informashon”.

Mas aleu Osepa a bisa ku e akusashon den su kontra ta abase di un entrevista ku el a hasi na un radio emisora lokal. Osepa ta refutá di a duna esun ku a entrevist’é na e radio, e lista di e kobradónan di ònderstant ku tabata riba kaya. El a bisa ku den komunidat tin mas hende kaminda ta akusá nan di algu ku nan no a kometé i esaki ta algu grave. “Minister Silvania ta lansa e akusashonnan akí i e kos akí ta peligroso. Bosnan no ta tende mi awe pero un hende asina ta peligroso. Un hende ku ta responsabel pa algu, enbes di karga esaki, ta hisa su sushi tira riba otro hende. Asina abo por kai será i abo ku ta inosente ta será”.

Osepa a splika ku su keho ta basá riba tres instrukshon:1). e instrukshon pa duna informashon sekreto ku ta riba kaya; 2). Esun ku Silvania ta kulpabel, pero e ta tir’é riba un otro. E ta trata di inkubrí e akto kastigabel; 3). E ta un ‘laster’, está, kometé ofensa.

Osepa a sigui bisa ku tin base pa investigá su denunsianan. Un hende mester para pa bèrdat i dualismo. El a inkorporá e karta di dia 11 di desèmber 2024 di minister Silvania su diskulpa di loke a pasa. “Esun responsabel ku a duna instrukshon ta minister Silvania. Ora e dokumento a yega serka dje, Silvania mester a kontrolá esaki, i no tir’é riba e ámtenar”, Osepa a terminá bisando.NOTA: Texto ta scirbi den Papiamento fonetico di Corsou.