JOIA Aruba by Iberostar ta ricibi su prome huespednan diaranson awor

ORANJESTAD – JOIA Aruba by Iberostar, e hotel mas nobo riba Eagle Beach, ta ricibi su prome huespednan diaranson awor. Asina e gerente general ⁠Arnaud Le Lanchon a conta Noticiacla dialuna mainta durante un recorido cu prensa. Un grupo di prensa selecta a haya un recorido di e hotel, dos dia prome cu nan ricibi nan prome 80 pa 100 huesped, cu lo ocupa entre e 140 cambernan cu ta habri y operacional e ora ey. E apertura oficial mes di e hotel ta tuma lugar den prome cuartal di 2025. E ora e hotel ta habri completo cu tur su 240 cambernan.

RECORIDO

E recorido a inicia den e lobby largo di e hotel, unda cu e gerente, asisti pa e director di mercadeo, ⁠Rudolfo Dirksz a duna un splicacion di e propiedad mas nobo di e cadena hotelero. Pa e occasion aki, a bin Aruba e director di publicidad pa henter e region aki di e cadena hotelero Paula Guimas, asisti pa e PR y Comunications Manager pa Aruba Ghislaine de Windt.

UNICO 

Por a observa algun punto unico di e hotel, unda cu a splica cu e diseño di e lobby mester pone bo sinti cu bo ta bou di awa, rondona pa coral y e pisca tipico di Aruba, e.o. e parrotfish. Mesanan unico, diseña specialmente pa Aruba tambe tabata ubica den henter e lobby. Mesanan, den forma di un maleta, tambe a hala hopi atencion. E colornan di henter e hotel, ta mustra pastel berde, y ta combina cu e aspectonan di laman rondona di Aruba.

CAMBERNAN

A mira varios tipo di camber (e hotel tin por lo menos 5 categoria), unda cu aki tambe, e diseño unico, combina cu colornan acuatico, a hala atencion. Tur camber, tin un diseño di pisca y e mapa di Aruba ubica riba e muraya, un papel specialmente diseña tambe pa nos isla. E ubicacion unico di e cama den cierto camber tabatin pone cu bo tin un bista directo di bo cama, pa Eagle Beach. E no tin tapijt, pasobra ta considera esaki como algo cu ta separa e hotel di otronan, primordialmente pa mantencion y calidad di camber. E camber ta contene tur lo ultimo di technologia cu awendia e biahero modern ta exigi. Bañonan moderno tambe no ta falta. 

SEMI PRIVATE POOL

Un seccion di camber, tin su area special unda cu cada un di e camber, ta sali den un tipo di ‘semi private pool’, cu sigur ta unico. Y tin otro camber cu tin su propio baño jacuzzi. Ademas tin un grupo di huesped, cu si ta miembro di e asina yama ‘Starprestige’, ta haya aceso na nan propio restaurant y piscina. 

PISCINA 

E hotel tin tres piscina, di cual uno tipo infiniti, netamente pa adulto so, cu un bista spectacular riba Eagle Beach. Tin dos piscina mas unda cu mucha tambe por ta presente. E hotel ta propiedad di Iberostar Hotels & Resorts cu su base na Spaña, y ta propietario tambe di e Golf Course Tierra Del Sol by Iberostar.