Decision unanime di PPA: Otmar Oduber mes ta bay Parlamento

Decision unanime di PPA: Otmar Oduber mes ta bay Parlamento

Posted on 12/12/2024 2:05 pm AST | Updated on 12/12/2024 2:09 pm AST

ORANJESTAD – E siman aki, Conseho di Partido PPA unanimamente a sostene pa Otmar Oduber mes asumi responsabilidad como Parlamentario y ta keda habri pa dialoga cu tur partido, manteniendo e curazon di nos programa “Nos Aruba 2025-2050”central. Asina e politico a confirma diahuebs pa noticiacla.com.

SENTENCIA FLAMINGO

Manera ta conoci diamars ultimo despues di e audiencia cu Gobernador Boekhoudt, Oduber a contesta un pregunta di prensa di ken ta bay porfin pa PPA den Parlamento. Esaki debi cu tin un sentencia pendiente di e caso penal di Flamingo unda cu Oduber ta e sospechoso principal. Y como tal tin e opcion cu dia 22 di januari 2025 cu e sentencia cay, cu Oduber por haya absolucion total manera cu su defensa a pidi huez, of e por haya un tipo di castigo. Y si e haya un castigo, e mes a declara, cu e ora e lo no drenta Parlamento, contrario na otro parlamentarionan cu si a keda den Parlamento aunke cu nan tabata sospechoso di un of otro caso, of awor te hasta, sentencia pa un huez, pero debi cu ley ta permitie, e ta ketobay den Parlamento. E castigo cu a pidi pa Oduber, ta e.o. 3 aña incondicional di prizon. Su abogadonan a pidi absolucion total. 

PARTIJRAAD TA DICIDI

Na e occasion diamars, Oduber a bisa cu e anochi ey lo tabatin un partijraad pa dicidi kico ta pasa y ken ta esun cu lo representa PPA den Parlamento, teniendo cuenta cu tur e aspectonan menciona. Y partijraad a dicidi cu ta Oduber mes ta esun cu lo representa PPA den Parlamento, a lo menos cu e keda sentencia na januari proximo. 

 Durante e ultimo eleccion, partido PPA a logra haya 3538 voto total, di cual 2419 a bay pa e lider Otmar Oduber. E siguiente riba lista, e number 2 Eduard Pieters a haya 148 voto. Si ta bon, pa ley electoral, Pieters ta e siguiente pa bay riba lista, si e no ‘gradici’. 

  • Powered by SETAR