Oduber: Mi a warda 5 aña, y mi ta warda 6 siman mas pa un sentencia den mi caso

ORANJESTAD – Otmar Oduber no tin problema pa warda 6 siman mas pa un sentencia den e caso penal Flamingo. Asina e la bisa Noticiacla dialuna atardi durante un conferencia di prensa riba e tema. Awe mainta laat, huez a suspende e caso y anuncia cu pa dia 22 di januari 2025 e lo dicta sentencia den e caso aki. Oduber a spera cu e sentencia lo a cay mas prome, den december, pero e no tin problema cu e tin cu warda algun siman mas. 

POSIBEL APELACION DI OM

Riba e pregunta cu si un eventual sentencia cay na su fabor riba 22 di januari proximo, kico ta pasa si OM dicidi di apela, e la bisa” Si nan durf di apela, ta mustra loke pueblo ta sinti. E sentimento ta mas duidelijk cu ta un persecucion politico esaki lo ta”. E ta mustra cu no tin ningun cos cu OM por para ariba y e hecho cu huez a bisa cu despues di dia 21 di januari 2025 cu e ta scucha e sospechoso Thiel, (e ta den exterior aworaki), e por dicta un sentencia asina mes, dentro di 24 ora despues, pues, ta meramente un formalidad pa scucha e sospechoso pa asina OM haya chens pa ‘coregi’ nan fayo haci den e caso aki.