Carlo: Huez mester absolve Otmar Oduber di tur cargo den caso Flamingo

ORANJESTAD – Huez mester declara Ministerio Publico no admissible den e caso aki, of absolve ex minister Otmar Oduber di tur cargo den e caso penal Flamingo. Y si esey no por, y si mester impone un castigo, pa Oduber wordo sentencia na e castigo cu e la sinta caba den ‘voorarrest’, pues cu e no mester sinta ningun castigo mas. Asina e abogadonan di Oduber a bringa diabierna pa gran parti di e dia pa nan cliente. Tabata prome chens despues di 5 aña y 3 luna cu e defensa a haya oportunidad pa mustra e banda di Oduber, for di 2019 cu e caso a ‘haya bida’. 

POLITICA VS LEY

E abogadonan Illis y Carlo a argumenta basta largo, mas di 3 ora pakico nan ta haya cu e demanda di Ministerio Publico no ta corecto y cu e demandanan no ta hustifica. A cuminsa na usa e carchi di politica, indicando cu ora cu trata un caso asina, no mester djis wak e parti legal, pero tambe e panorama politico den cual tur cos ta tuma lugar. Sigur si trata e caso aki den pleno campaña pa eleccion cu ta aki un par di dia. Y pesey tambe, kier pa huez tene cuenta cu tur esaki y dicidi mas liher posibel riba esaki. 

ORDEN DEN DIP Y PRIVILEGIO

A cuminsa na splica cu na entrada di Oduber como minister di infrastructura, e la haya e departamento Directie Infrastructuur en Planning (DIP) un ‘rotzooi’. Prome cos cu e la haci tabata cambia e maneho, structure pa e ta mas transparente posibel, pa evita netamente e loke cu nan cliente ta wordo acusa di dje. Segun e abogadonan, e maneho cu e la haya, si tabata viola e ley di ROPV, cu ta determina unda tur no por tin construccion pa motibo di proteccion di naturalesa. A usa testimonio di e director di e tempo ey J Croes, di cual keho riba e funcionamento, no tabata di tempo di Oduber, sino esun cu a sigui, cu ta Marisol Tromp. Ademas, no ta considera e declaracion di Croes como confiabel. 

Ademas no ta asina cu a actua robez den DIP, pero cu ta netamente a ‘coregi’ e fayonan cu tabatin. “Nada mas, nada menos”. Ademas, den e loke ta wordo considera metemento di minister, Oduber nunca tabata envolvi den combersacionan cu e ciudadano cu lo a keda perhudica cu tereno esta Genser. Algo cu tanto Croes como e sospechoso Croes-Wever a confirma. 

NO CASTIGA AMISTAD

Ora cu a trata e parti di reserva di tereno, unda cu e fayo lo a wordo cometi entre dos ciudadano, cual OM ta considera metemento di minister, e abogadonan a argumenta cu esaki (esta e reservacion di tereno) ta algo cu ta completamente pa cuenta di DIP y no minister Oduber. “E no tabata envolvi den e proceso”. Ademas a mustra cu un amistad cu e ciudadano Cano y su casa Mansur, no por ta un problema. “E amistad y e relacion politico no por ta un problema y no ta algo castigabel pa ley”, e abogado a bisa. Segun e abogado, OM kier castiga un persona debi cu e tabatin amistad. Ademas, segun e abogado, OM no por a prueba cu a haya algo di supuesto ‘privilegio’. Y como tal mester absolve nan cliente di tur e cargonan, cu ta entre nan, soborno pasivo, estafa, abuso di poder.