Analsis: Legumai victoria, formacion ta e cos!

Scirbi pa Tito Laclé

Faltando un siman pa pueblo bay urna electoral pa e eleccion parlamentario, tin un cos cu sigur ta resalta e biaha aki. E problema no ta bay ta ken lo gana e eleccion, sino ken lo  forma e gobierno. Entre e encuestanan di noticiacla, e ‘debatenan’ publico cu a keda presenta, y un sin fin di programa politico e biaha aki, tin un cos cu ta resalta. Mayoria partido, pa no bisa tur, ta contra e partido mas grandi na mando, partido MEP. Mientras cu e partido geel ta sali victorioso den tur pronostico y presentacion recien lagando e otro partidonan basta leu, e partido tin un otro problema mas pio: Si e gana, cu ken e ta forma e coalicion. Cu excepcion di partido LPR (Lucha pa Reforma), ningun partido ta sinti pa traha cu MEP. Y esey por bira un problema pa e partido geel, aunke e ta ‘mustra’ superior riba tur otro partido. Mayoria di e programanan di e partidonan nobo, partido chikito, y e otro partido ‘tradicional’, ta diferencia hopi di partido MEP. Y si tin similaridad mes, e indeseo di traha cu MEP, ta surpasa e similaridadnan ey. Mayoria di e partidonan a profila nan mes como ‘partido anti MEP’. Sea cu nan ta bisa esaki textualmente, of ta mustra indirectamente den nan forma di expresa nan mes. Nan no ta ‘exclui’ participacion cu e partido MEP publicamente, pero no ta mustra simpatia pa e partido. Kico esaki kier men, den practica? Cu si MEP gana eleccion y tin cu forma gobierno, cu e lo bira un dolor di cabez grandi, un periodo largo, y cu combersacionan hopi dificil mes. Desconfiansa ta e problema principal, y esaki ta di ambos banda. No ta pornada cu e partido geel ta boga na su siguidornan pa duna nan e mandato pa goberna nan so, pa netamente evita e dolor di cabez aki. E pensamento di gana anochi, perde mainta, ta bin na mente. Esaki ta nifica cu un partido ta gana e eleccion, bira e partido di mas grandi, pero no ta logra forma un coalicion pasobra sea e diferencia entre partidonan ta mucho grandi, of e confiansa necesario, simplemente no tey. E lider di partido geel mes a bisa den varios programa recien, cu e la purba dos biaha pa forma un coalicion y ambos no a bay full e termino. Pues ta ora pa nan bay nan so. Partido AVP cu den pasado tambe tabata pidi nan siguidornan pa un mandato total, e biaha aki ta mas cuidadoso den nan strategia. Nan ta simplemente bisa cu nan ta e solucion, y por nota cu tin un ‘union’ invisible cu e partidonan actual den oposicion. Esaki por nifica cu e lo ta mas facil pa e partido berde forma un coalicion aworaki cu e partidonan cu ta den contienda, envez di e partido geel. Loke ta resalta, ta cu e biaha aki, faltando apenas un siman, ainda hopi hende no tin claridad kico e resultado lo bira, y tampoco tin claridad di con e proximo gobierno lo ta forma. Un cos ta sigur: E ta(bata) un campaña hopi interesante, cu hopi variable desconoci cu ta haci cu riba 6 di December, tur hende ta pendiente pa wak KEN finalmente ta gana careda aki, pero mas importante, CON e proximo gobierno su constelacion lo ta. Tik, tok, tik, tok…