OM: Caso Flamingo ta mustra con corupcion structural ta tuma lugar pa privilegia hende riba otro

ORANJESTAD -  E caso penal Flamingo cu Ministerio Publico dialuna a trata e rekisitorio, ta conoce su comienso cu kehonan entrega contra e ex minister Otmar Oduber pa e.o, duda riba su cuentenan bancario internacional, y cierto otorgamento dudoso di tereno na ciudadanonan di Aruba. Tur esaki ta conoce su inicio na 2019. Parti di e investigacion, a keda adkeri durante un entrada hudicial, y otronan tabata durante un periodo cu a tap telefon, y tambe interogacionan haci. Mirando cu OM tabata confronta cu situacionan di falta di personal, un cantidad grandi acumula di caso, mester a tuma cierto decision con pa sigui. Entre nan, cua caso pa sigui y cua pa wanta. Y esey ta splica e tardansa den e caso aki, cu por a dura asina largo. Loke a trata durante e investigacion, tabata tambe keho entrega di ex minister Marisol Tromp, su declaracionan riba e.o, ambtenaar spirito, usa Serlimar y DIP como un lugar pa duna trabou na esnan cu tabata coopera y faborece Otmar Oduber prome y despues di eleccion unda cu e tabata minister. Otro clave tabata e denuncia haci pa ex director di DIP, J. Croes. Aki e otro sospechosonan tambe a bin den e wega. Entre otro esun despues di Oduber, cu ta considera como su man drechi, durante e periodo cu Oduber tabata minister. E yiu homber di Oduber, tambe lo a probecha segun OM, door di usa un persona cu a haya trabou como ambtenaar, pero no tabata presenta na trabou, y mas bien tabata haci trabounan pa e negoshi di e yiu homber, pero tabata wordo paga door di gobierno, sin cu e tabata presenta na trabou. Esaki ta splica e envolvimento di e yiu homber J. Segun OM, Oduber (Otmar:red) tabata ubica su hendenan den lugarnan clave, pa asina e por tabatin control total, den e caso aki tanto na DIP como Serlimar, dos lugar cu tabata cay bou di responsabilidad di e minister. Uno directamente y e otro, un sui generis. 

MALMOK

Un di e acusacionan contra Oduber, ta abuso di su funcion y tambe falsificacion di documento. Oduber lo a splica masha bunita durante un conferencia di prensa na inicio di su periodo como minister, con transparente y husto e situacion na DIP lo tabata, pero e realidad a resulta completamente otro. Entre otro e excepcionan cu a wordo crea y cu tabata pone cu cierto hendenan tabata wordo privilegia riba otro. Den un caso specifico, usando tap di telefon, fiscal a referi na e caso unda cu a duna un persona un tereno, esta e persona G, pa despues kita e tereno for di dje, pa duna otro ciudadano P, contra tur regla cu tabatin. Y ora cu a bay confronta e persona encarga pa atende cu e situacion, actual sospechoso, e dama C, a resulta cu e la wordo ordena pa Oduber pa haci cambionan necesario. Esaki OM a bisa di por prueba, via tapmento di telefon y uso di chat di whatsapp, entre e respectivo personanan. Durante un tap di telefon, OM p.e, ta relata cu Oduber tabata declara na DIP cu e ta e hefe y cu cos mester bay segun e ta bisa. “Oduber tabata dicidi, y tabata duna orden na C. DIP mester a simplemente ehecuta e ordennan duna.

CUATER TERENO CLAVE

Mientras cu siman pasa huez ya caba a confronta e sospechosonan cada uno cu e caso aki, awe fiscal un biaha mas a bin riba e tema di e 4 terenonan den cual tabatin cambio riba orden di Oduber. Aki tres ciudadano tabata envolvi, G, F, y P. Aki OM a purba splica con Oduber y Croes tabata manipula cu tereno, no siguiendo e proceso di tereno, reservacion di tereno y no tene nan mes na regla di garantianan di banco. Segun OM, e conclusion tabata cu Oduber mes tabata ocupa su mes personalmente cu e situacion di tereno pa e tres personanan, pues mientras cu ta pinta cu tur cos ta un proceso transparente, tabata e minister cu tabata dicidi tur cos.  

AMBTENAAR SPIRITO

E asunto di ambtenaar spirito (persona cu ta haya un contracto di gobierno pa traha como ambtenaar, pero cu nunca no a presenta na trabou:red) a bin dilanti cu e denuncia di ex minister Marisol Tromp. Specificamente dos persona cu segun Tromp, e la denomina como tal. E forma con Oduber tabata atende cu trahadonan, tabata increible segun OM. A usa e dicho hulandes, ‘Hij spande de kroon’, esta cu e tabata rey den maneha e situacion di trahado, ambtenaar. Y for di declaracion di director di DRH (departamento di recurso humano), no por a haci mucho, pasobra ora ta trata di emplea hende directo na minister, ta e minister ta dicidi esaki. Aki a trata e tres personanan Phillips, Geerman y Thiel. Tur tres emplea pa Oduber, pero cu supuestamente nunca a presenta na trabou. Phillips tabata contrata pa maneha e situacion na San Nicolas, Thiel tabata traha como ambtenaar pero mas bien a bira un ‘empleado’ pa e negoshi di yiu di Oduber. Aki OM a presenta varios yamada y chat cu a wordo getapt, pa comproba e link entre nan dos, y con e yiu tabata duna ordo na e homber Thiel. Pa loke ta Geerman, e conoci locutor, tambe a usa jamada y chat tap contra dje, pa asina purba link e cu Oduber y prueba cu e trabounan otorga, tabata nada menos cu un front pa Oduber por hustifica nan trahamento como ambtenaar. A usa declaracion di varios testigo cu a testigua cu enberdad e personanan aki nunca no a presenta na trabou. 

ESSER

Mientras cu e sospechosonan tabata sigura cu no a privilegia ningun hende, fiscal a purba mustra cu e privilegio tabatey, y selectivo. Loke segun OM tabata notable, conforme e tapmento di telefon, ta cu dependiendo e afiliacion di e persona, tabata dicidi su destino. Entre nan a usa un chat di un persona liga na e partido opuesto (e tempo ey Oduber tabata lidera partido POR), unda cu e man drechi di Oduber, a sigura e persona en cuestion, cu debi na su afiliacion cu AVP, e ta wak e chens chikito cu e lo por a wordo yuda. Tabatin henter un lista di hende cu mester a wordo yuda, un lista di persona cu tabata sea campañador, of personanan liga na e minister, cu mester a haya un fabor bek, como pago pa nan ayudo. 

CONTINUACION

A sigui henter un splicacion detaya cu mas nomber, y mas puntonan similar, cu pa OM tabata e intencion pa mustra con hopi e ex mandatario tabata envolvi. Un lista di nomber di hende, kico tur a haci pa nan, con nan tabata envolvi y mas. Tur cu e intencion di OM, pa mustra e operacion corumptivo dentro di varios lugar cu tabata sea liga na e minister of tabata cay bou di e minister. E dos departamentonan cu a repasa detayadamente, cu nomber di mas persona, tabata Serlimar y DIP, unda cu tabata purba pinta un cuadro cu e dos departamento aki tabata manera un centro pa ubica personanan liga na Oduber, y no usando e proceso regular estableci pa emplea hende na ambos departamento y compania. 

DEFENSA

Diabierna mainta tempran, e defensa di tur e sospechosonan ta cuminsa, unda cu e prome pa cuminsa, ta e abogadonan defensor di Otmar Oduber. Nan a splica huez cu nan mester di mas of menos 2 ora di tempo pa contra aresta tur e puntonan treci dilanti pa OM, y pa desbarata tur loke cu OM a presenta como prueba, cu Oduber a actua ilegalmente y contra ley, pa cual a pidi un castigo considerablemente halto, di 3 aña di prizon y un otro demanda, pa e otro sospechosonan, conforme nan participacion y nan situacion actual.