Miss Universe Aruba Anouk Eman a bolbe Aruba di su presentacion na Miss Universo

ORANJESTAD - Miss Universe Aruba Anouk Eman a bolbe Aruba di su presentacion na Miss Universo 2024 diamars den curso di dia.   

Aruba Tourism Authority (A.T.A.) tabata presente na aeropuerto pa ricibi Aruba su representante, y a celebra logronan sobresaliente di   Anouk Eman, despues di su presentacion riba e podio mundial di Miss Universe 2024, pero tambe despues di simanan ta representando Aruba dignamente.

LOGRO DI ANOUK

Anouk su logro como un di e top 30 finalistanan y su reconocemento como Silver Finalist pa e prestigioso premio "Voice for Change" ta amplifica su dedicacion, forsa, y compromiso pa su isla riba un plataforma global. Cu e proyecto inspirador “Iron Women,” Anouk a trece atencion, confianza, y compromiso autentico riba e importancia di ta resiliente y riba e importancia di empoderamento di e ser femenino, demonstrando su pasion pa yuda y trece cambionan positivo den nos comunidad.

BON BINI

“A.T.A. ta extende un bonbini caluroso. Nos ta yena cu orguyo y aprecio pa su representacion y contribucion na nos isla y na promocion di esaki. 

Masha danki y Masha Pabien” Ronella Croes, CEO di ATA a bisa finalmente.