Reunion di Parlamento riba metemento den OM a bira un show total

ORANJESTAD – Lidernan di fraccion di MAS (Marisol Tromp), ACCION21 (Miguel Mansur) y parlamentario independiente Gerlien Croes a inicia e reunion publico (OB) den Parlamento diamars mainta protestando fervientemente contra e hecho cu e reunion no ta uno estilo OV (Openbare Vergadering) sino un OB. Un pa un, nan a splica den nan ‘punto di orden’, cu e reunion no tin sentido den e forma aki, pasobra asina e.o. nan no por haci nan disertacion di 20 minuut, vs 10 minuut cu regla ta mustra. A sigui un bay bin entre ministernan Wever-Croes y Tjon y e parlamentarionan en cuestion y e intento di e presidente di Parlamento pa purba controla e reunion, locual no tabata facil. 

Dado momento, parlamentario Gerlien Croes y fraccion di AVP a bandona e sala debi cu nan no tabata mira e sentido pa ta den e reunion mas. " No tin ningun contenido, un tristesa! Aruba merece miho, e organo di mas halto di nos pais!!!!" e la opina despues riba su pagina di Facebook. Parlamentario Marisol Tromp a te asta trece un mata di Moringa pa prome minister Wever-Croes como 'regalo', den forma di un mensahe. Esaki pasobra e caso penal riba fraude na DIP a haya netamente e nomber ey, esta Moringa. E reunion a termina asina, unda cu por a mira cu varios parlamentario independiente no tabata mucho contento cu nan coleganan parlamentario, tirando palabra pa otro. E reunion a parce mas un show di comico cu un reunion serio.