Sagicor Life a organisa un 5K Funwalk pa consientisacion di cancer di pecho

ORANJESTAD - E team di Sagicor Life   a organisa ‘We Care We Walk’, un 5K Fun Walk riba diadomingo 13 di october, como sosten di Luna di Consientisacion di Cancer di Pecho, treciendo e comunidad hunto pa un causa significante. Tur fondo recauda y duna na e evento lo wordo dona na e partner di Fun Walk: Stichting BOB, un organisacion dedica na conscientisacion di Cancer di pecho y e importancia di screening trempan na Aruba.

E caminata, cu a cuminsa 6:00am for di e lugar di staciona auto di Vida Properties, e localidad di Cuts & Curves Gym y e oficina di Sagicor cu pronto lo habri, a wordo sostene cu entusiasmo pa tur cu a tuma parti, incluyendo famianan, amigonan, y gruponan di negoshi. Participantenan a wordo encurasha pa bisti na roos pa mustra nan solidaridad cu sobrevivientenan di Cancer di Pecho y esnan cu ta bringando e malesa actualmente. E participante mihor bisti, Rosa Kelly-Yarzagaray, ta un sostenedor di consientisacion di Cancer di Pecho hopi motiva. E evento a wordo diseña no solamente pa promove conscientisacion pero tambe pa encurasha un bida saludabel y union den e lucha contra cancer di pecho.

“Nos ta masha entusiasma cu e participacion activo y gran sosten di e comunidad y di nos voluntarionan di Sagicor, e sponsernan y otro boluntarionan. Unabes cu e planificacion a cuminsa, asina hopi tabata entusiasma pa bin abordo y sostene. Y e resultado tabata un ambiente familiar y di celebracion.” asina Randall Croes, Branch Manager pa Sagicor Life a bisa. “Cancer di pecho ta afecta asina hopi bida, e por ta bo ruman muhe, mama, colega of bon amiga cu por ta un victima y nos ta comprometi pa haci di nos parti den conscientisacion y busca fondonan pa sostene e trabou importante di Stichting BOB. Nos ta extende nos danki di curason na tur cu a participa y contribui.”

Diantha Nuesch di BOB Aruba a bisa, “E organisacion di e evento tabata magnifico y tur hende di Sagicor y Stichting Bob a yuda pa e tabata un exito. Ami y mi team ta hopi agradecido pa e evento, tur e fondonan ta bay pa Stichting BOB Aruba, y nos ta aprecia esey inmensamente. Cu e fondonan nos lo por aumenta nos esfuersonan di mercadeo y promocion pa asina tur hende riba e isla compronde dicon screening y deteccion trempan ta importante. Nos tur tin hende muher den nos bida cu nos lo kier tene cu nos mas largo y deteccion trempan por haci un diferencia.”

E fondonan recauda pa medio di e evento lo bay directamente pa Stichting BOB pa sostene nan esfuersonan den brinda educacion, recurso, y asistencia na individuonan afecta pa cancer di pecho den henter Aruba. Sagicor y su sponsors a cubri tur gasto material di e evento.

Cada participante a ricibi un medaya como recuerdo di nan participacion.