Faltando 4 dia, tin 5 partido ainda buscando 586 firma pa por bay eleccion

ORANJESTAD – Faltando 4 dia (incluyendo awe) pa partidonan politico colecta suficiente firma (586) pa sigura nan participacion den e proximo eleccion (December 2024), tin 5 partido cu ainda ta den e ‘careda’ aki. Lucha pa Reforma (LPR) ta esun cu diaranson merdia a logra e meta, y sigurando asina su prome participacion den un eleccion parlamentario como partido. E partidonan cu falta ta RED, CURPA, HTC, MIA y UPP. 

ESUN MAS CERCAFor di e data di Censo, RED ta esun mas cerca y proximo pa completa e meta faltando ‘apenas’ 52 firma, cu posiblemente por keda logra prome cu diahuebs merdia. Ta sigui e partido CURPA cu falta 240 firma, sigui pa HTC cu falta 363 firma. E dosnan cu ta mustra cu nan lo no logra, aunke cu falta 4 dia, ta MIA y UPP. Ambos ta bayendo hopi lento. Pero, tin 4 dia y tur tin posibilidad pa logra esaki. 

YUDA PA OTRO PARTIDO

Ayera un biaha mas tabatin e comentario comun cu e partidonan menos ‘comun’, manera LPR, a haya ayudo di partidonan manera MEP, ora cu un voicenote a plama di parlamentario Hendrik Tevreden pidiendo hende pa firma e lista di LPR, pero pa vota pa MEP den e proximo eleccion. Noticiacla no por a verifica (ainda) cu Tevreden, cu realmente ta su persona, aunke cu e voz y e informacion ta duna e indicacion si cu ta Tevreden.