Mansur (ACCION21) kier modernisa nos ley electoral pa duna Arubano den exterior derecho di voto

ORANJESTAD - Recientemente fraccion ACCION21 a presenta un iniciativa di ley nobo cu e meta pa practicamente modernisa nos leynan electoral y duna Arubano bibando den exterior e derecho di voto. Esaki ta un cambio grandi segun Mansur, pasobra Arubano den exterior no tin derecho di voto. Esaki ta un iniciativa di ley entrega na Raad van Advies cu e fraccion a traha detayadamente riba dje cu varios punto y cambio importante cu lo haci e proceso uno hopi mas democratico di locual e ta actualmente.

E cambio grandi cu e iniciativa di ley aki ta trece cu ne sigur ta e parti di brinda Arubano den exterior derecho di voto. E di dos punto cardinal den e ley aki segun Mansur, ta trata cu candidatonan cu tin mas voto riba un lista ta procede pa Parlamento, no segun numeracion manera cu e ta actualmente. E di tres cambio den e legislacion ta toca e sistema di restzetels. Si un partido yega 75% di kiesdeler e ta bin na remarke pa un posibel restzetel. Despues cu tur otro partido cu a logra un asiento haya un restzetel, partidonan cu a yega 50% di kiesdeler tambe ta bin na remarke pa un posibel restzetel. “E ta haci’e mas democratico,” lider di fraccion ACCION21, Miguel Mansur ta expresa.

E di cuater punto of cambio ta introduccion di eleccion primario, mescos cu tin na Corsou. Nos ta den un situacion caminda cu partidonan ta abusa di nos leynan electoral, e partido grandinan ta manda nan sostenedonan firma pa partido chikito cu den eleccion ta saca menos voto cu cantidad di firma. Cu e cambio nobo aki, durante dos dia tin un eleccion primario unda lo vota pa wak cua partidonan realmente tin sosten pa bay eleccion of no. Finalmente, e di cinco cambio ta introduccion di un limite di termino: diesdos aña maximo bo por sinta como parlamentario, ocho maximo bo por sinta como minister, y ocho aña maximo como prome minister. Si bo haci tur tres, cumisando na parlamentario, despues como minister y prome minister, bo por pasa un total di 28 aña den politica pero no mas cu esey.

Finalmente, ACCION21 ta subraya cu kier separa eleccion pa parlamentario y minister, pero esey ta bay mas leu cu e cambio di ley aki. “Esey nos kier haci den un simposio nacional pa discuti esey cu pueblo,” segun Mansur.

STIMULANDO ENVOLVIMENTO CONTINUO

E cambio di ley aki lo no solamente simplifica e proceso, pero tambe lo curasha envolvimento continuo di Arubanonan den exterior den nos proceso electoral. E reforma aki tin e meta pa crea un experiencia di votacion pa nos yiunan di tera den exterior cu ta stabil y eficiente tambe, fortaleciendo e conexion entre diaspora Arubano y nan hogar.